Asina lo avanzó'l mesmu Rivera, nuna entrevista en Telecinco, recoyida por Europa Press, na que contó que munchos puntos del pactu de socialistes y 'ciudadanos' podríen soscribilu los votantes del PP porque, tal como reconoz el mesmu Rajoy, los trés partíos tienen un "nexu común", mientres que Podemos "ta fuera de dalgunos de los grandes consensos" del país.

   "Si'l PP diz que non a esti acuerdu nun ye un problema de Ciudadanos, ye del PP, porque los sos votantes van tar más d'acuerdu con esti documentu constitucionalista que colos que diz ERC", dixo.

   Tamién cuntó que lo que realmente fizo a Podemos colar de la mesa de negociación col PSOE ye que'l pactu refuga de planu un referendu en Cataluña, y los d'Iglesias tienen nel so senu cuatro grupos distintos, ente ellos a representantes del partíu de l'alcaldesa de Barcelona, Ada Colau, que fizo bandera d'esa esixencia.

   Rivera reprochó a Rajoy que criticara l'acuerdu antes de lleelu y aprovechó pa dicir que'l PP debería tamién "cavilgar" sobre los sos mecanismos de democracia interna, porque si Mariano Rajoy debe o nun separase "ye daqué que tienen que decidir los militantes del PP".

   Rivera calcó en que'l problema del PP ye que quier presidir el Gobiernu cosa que, alvirtió, taría mui bien si Rajoy nun refugara dir a la investidura cuando-y lo plantegó'l xefe del Estáu. "Ye que'l rei quedó...", llegó a dicir, y avisó una y otra vez a Rajoy de que nun pue nun querer gobernar y coles mesmes torgar que gobierne otru.

   Asina, defendió que Pedro Sánchez asumió'l papel que nun quiso asumir Rajoy, y que tanto socialistes como 'ciudadanos' trabayen pa qu'haya Gobiernu y puean faese reformes. Ye más, negó que Ciudadanos tea actuando por electoralismu, porque "con 40 diputaos y les encuestes subiendo sería más cómodo quedar nun requexu y dicir que non a tou".