La exsecretaria d'Estáu estaounidense Hillary Clinton señaló que nun hai motivos que lleven a Estaos Uníos a siguir usando eses instalaciones y refirióse a Guantánamo como un anunciu de "reclutamientu de terroristes", mientres un actu celebráu nel estáu de Carolina del Sur.

   Clinton añadió que la decisión sobre a ónde tresferir a los presos que permanecen en Guantánamo tien que ser "resultáu d'una negociación", tal como informa la emisora estaounidense Voice of America.

   Pela so parte, el senador por Vermont Bernie Sanders señaló que zarrar a xente en Guantánamo tuvo "repercusiones en tol mundu pa Estaos Uníos", faciendo ver al país como "hipócrita".

   Clinton y Sanders enfréntense otra vuelta esti sábadu nes elecciones primaries de Carolina del Sur, onde Clinton parte con una ventaya de 20 puntos porcentuales sobre Sanders, según delles encuestes publicaes la última selmana.

   Obama anunció'l martes l'envíu al Congresu del plan del Pentágonu pa proceder al zarru "d'una vez por toes" del centru de detención de Guantánamo, argumentando que la so existencia perxudica a la seguridá d'Estaos Uníos.

   El presidente llamentó que la postura de los republicanos nel Congresu torgara hasta agora zarrar el centru de detención como él prometió antes de llegar a la Casa Blanca y apeló a "zarrar un capítulu na historia" d'Estaos Uníos y "facer lo correcto".

Foto: BOB STRONG / REUTERS