"De momentu'l PSOE paez escoyer, y esa elección nun ye compatible con Podemos", sentenció Errejón nuna rueda de prensa qu'ofreció nel Congresu a les 16.00, media hora antes de la xunta qu'en teoría tenía de caltener col PSOE y qu'a lo último nun se produxo. Ello ye que compareció acompañáu pol so equipu negociador al completu.

   En confesando que tomaron esta decisión con "decepción", el númberu dos de Podemos llamentó que col acuerdu que los líderes de PSOE y Ciudadanos, Pedro Sánchez y Albert Rivera, roblaron esti miércoles pela mañana, "perdióse una oportunidá" pa formar un gobiernu de cambiu.

"ACUERDU REDACTÁU PENSANDO NEL PP"

   Al so xuiciu, trátase d'un documentu redactáu "pensando nel PP", col oxetivu de sumar a los 'populares' y non al restu de fuerces, y polo tanto nun tien sen siguir alantre coles negociaciones entamaes esta selmana, tres más d'un mes de desalcuentros.

   "Paezmos que nun ye un acuerdu nin progresista nin reformista. Va facer les delicies del Ibex 35 y los sectores privilexaos poles polítiques del PP nos últimos años. Ataca y ye lesivu pa los derechos de les mayoríes sociales que sufrieron la crisis", denunció.

   Errejón avisó tamién de qu'esti acuerdu, amás de ser "incompatible" col cambiu, "nun suma" y namás va llevar a una "investidura fallida",  sacantes que'l PP dexe cola so astención que Sánchez saque alantre la so investidura la próxima selmana, tal como quier Ciudadanos.

   Nesti sen, el númberu dos de la formación morada volvió a defender que namás existen dos opciones posibles pa formar gobiernu: la de la "gran coalición" que formaríen PSOE, Ciudadanos y el PP; y la del gobiernu del cambiu que ta estudiándose na mesa de negociación a cuatro bandes ente PSOE, Podemos, Compromís ya Izquierda Unida-Unidá Popular, que tamién se rompió en llevantándose los de Pablo Iglesias.

   D'esta manera, Errejón volvió refugar una posible astención de Podemos na investidura de Sánchez, dao que nun tán dispuestos a ser meros "figurantes" d'un "acuerdu cosméticu" que nun soluciona los problemes de los españoles. "Realizó una elección incompatible cola opción de que los representantes de cinco millones de votos apoyen un gobiernu que nun sería de cambiu en nengún casu", repitió.

SIGUEN COLA MANO TENDIDA"

   Sicasí, el númberu dos de Podemos aseguró que nun tiren la toalla, dao que siguen cola "mano tendida" pa consiguir pactar un gobiernu "de cambiu y de progresu" col PSOE tres la previsible "investidura fallida" de la próxima selmana, tres la que va abrise "un nuevu tiempu".

   "Vamos siguir intentándolo. Dempués d'esa investidura ábrese otru tiempu y la nuesa mano sigue tendida pa conformar un gobiernu de cambiu y plural", reafirmó, recordando que la ufierta de Podemos pasa necesariamente per conformar un Executivu de coalición. "Pero a esta hora, ye una oportunidá zarrada y bloquiada", sentenció.

   Sobre l'escenariu que tendría que dase pa que se retomen les negociaciones, Errejón esplicó que nun ponen condiciones, y tampoco torguen al PSOE falar con otres formaciones, pero nun puen pretender "pactar blancu" nuna mesa y "negru n'otra". "Podemos volver a sentanos en cualquier momentu, pero sentámonos pa trabayar, el documentu tien que llevantase", reclamó.

   Podemos tomó la decisión final de romper la so negociación col PSOE en lleendo con detenimientu'l documentu publicáu esti miércoles pela mañana, dao que namás unes hores de la comparecencia d'Errejón tovía aseguraben que nun contaben llevantase de la mesa.

SIN SUBIDA DEL SMI NIN DEROGACIÓN DE LLEI MORDAZA O REFORMA LLABORAL

   En dichu documentu alcontraron cuestiones "incompatibles" col cambiu, como "l'abaratamientu del despidu", y ausencies como la subida del salariu mínimu, la reforma del artículu 135 de la Constitución, o la de la reforma llaboral y la llei mordaza, que megar d'afirmar Sánchez que van llevales a cabu, nun figuren nel testu. "Tenemos qu'agradecer la sinceridá del documentu. Hai voluntá d'acuerdu, pero con Ciudadanos y mirando al PP", repostió Errejón.

   "Nun fuimos nós los que ficimos esta elección. Entendimos qu'hai qu'escoyer, pero esto nun zarra esti ciclu políticu, encaminámonos a una investidura fallida, pero dempués sigue'l ciclu políticu", afondó.

   Sobre les posibilidaes que s'abren tres esa "investidura fallida" qu'agora la próxima selmana, Errejón prefirió nun facer hipótesis porque "dos meses ye munchu tiempu". "Tal como tán les coses, ye bien difícil refugar cualquier escenariu", aseguró, a preguntes sobre si esperen un xiru na estratexa del PSOE pa recuperar el so apoyu.

   Ello ye que'l númberu dos de Podemos afirmó que nun descarten nin siquier la posibilidá de que'l rei encargue al secretariu xeneral del so partíu, Pablo Iglesias, formar gobiernu. "Ábrese un escenariu inéditu. Nun descartamos nenguna posibilidá, pero valorarémosla pasu a pasu", esplicó.

Foto: Dani Gago/Podemos