Les Fuerces y Cuerpos de Seguridá del Estáu y les policíes autonómiques rexistraron l'añu pasáu casi cuatro delitos d'odiu al día, un total de 1.324 casos que nun 38,2% correspondíen a manifestaciones de racismu y xenofobia y nun 18,1% conllevó mancadures, según l'avance de resultaos presentáu esti miércoles pol ministru del Interior, Jorge Fernández Díaz. Una de cada diez víctimes yeren menores d'edá.
La cifra supón una subida del 13% en comparanza col 2014, pero la diferencia atribúise a un "perfeccionamientu de la recoyida de datos" y a la incorporación de dos nueves categoríes qu'antes nun se rexistraben, los delitos d'odiu por razón d'ideoloxía y aquéllos que se producen por razón de xéneru, introducíos nel 2015 cola reforma del Códigu Penal.
"El pesu cuantitativu d'esta criminalidá pue considerase baxu nel contestu de la criminalidá xeneral, pero la so naturaleza ye tal qu'una sociedá civilizada y democrática nun pue convivir pasivamente con esti tipu de conductes", destacó'l ministru, pa recalcar na necesidá de qu'esta realidá surda y les sos víctimes decidan denunciar.
En total, el 38,2% de los 1.324 casos yeren por racismu o xenofobia, un 6,5% más que nel 2014; el 23,3% por razón d'ideoloxía y el 16,9% motivaos pola discapacidá que presentaba la víctima, delitos éstos qu'aumentaron un 12,6% en comparanza col añu anterior.
Coles mesmes, el 12,7% fueron delitos d'odiu por orientación sexual, casos que rexistraron un descensu del 67% nel 2015 que, según esplicó Fernández Díaz, "obedez a la subida de la formación y al meyor rexistru de los fechos conocíos". "Non poques estes conductes, por poca formación, tipificábense de manera non afayadiza", añadió.
Tamién prodúxose una cayida notable nos delitos d'odiu por antisemitismu, que basen un 62% resepcto al 2014 y representen el 0,7% del total, con nueve casos. Nel llau opuestu, aumenten un 36,4% los d'aporafobia (odiu a los probes), que representen el 1,1%. Los motivaos por razón de xéneru, de nueva incorporación na estadística, son el 1,8% del total.
Tocantes a la tipoloxía delictiva d'estes manifestaciones d'odiu, la más frecuente fueron les lesiones, que se dieron nel 18,1% de los casos, les amenaces presentes nel 15,5%; y les inxuries, con un 8,5%. Síguen los actos racistes y de violencia nel deporte (6,6%) y los daños (6,5%) anque tamién se rexistraron 58 casos d'abusu sexual (4,4%)y 49 vexames leves (3,7%). Consten amás, 38 delitos contra la Constitución (2,9%).
El 60% de les víctimes d'estos delitos son homes y daqué más del 10% yeren menores d'edá. En total, 60 menores tán acusaos d'estes conductes l'añu pasáu. "Esto indícanos qu'hemos tar alerta en tolos ámbitos, pero especialmente nel educativu", apuntó Fernández Díaz. El so departamentu va publicar el balance estadísticu completu con más detalles sobre esti capítulu nes próximes selmanes.
