El presidente del Gobiernu en funciones, Mariano Rajoy, aseguró esti miércoles que'l preacuerdu qu'algamaron el PSOE y Ciudadanos "nun val pa nada" porque nun cuenta con apoyos bastante nin fala de los temes qu'importen a la xente como'l paru". "Dalgunos califíquenlu de pactu de salón o publicitariu. Yo nun voi entrar neses coses y a namás digo que nun ye d'investidura nin de Gobiernu", recalcó.
Asina pronuncióse nuna entrevista n'Antena 3, recoyida por Europa Press, dempués de que'l PSOE y Ciudadanos zarraren un principiu d'acuerdu qu'inclúi una reforma exprés de la Constitución y torga una subida del IRPF. El líder del PSOE, Pedro Sánchez, y el presidente de Ciudadanos, Albert Rivera, van presentar esti miércoles el so acuerdu nel Congresu en recibiendo l'aval de les sos Executives.
Amás, el xefe del Executivu en funciones confesó que-y abluca'l "entusiasmu" de Ciudadanos por "afitar" al PSOE porque primero dio-y la presidencia del Congresu y agora quier facer presidente del Gobiernu a Pedro Sánchez. Por eso, avisó que diba ser "demasiao fuerte" que Ciudadanos participe nel acuerdu si a lo último súmase Podemos. "Podríamos meter tamién a ERC y fairíamos daqué verdaderamente notable", ironizó.
Tamién criticó qu'esi pactu nun fale de los problemes importantes d'España como'l paru y la situación económica y céntrese n'asuntos como los aforamientos. "La xente merez un respetu --dixo--. Prestábame que se falara de lo importante", y mentó en concreto la creación d'empléu, la unidá d'España, la política antiterrorista y el caltenimientu de los servicios públicos como la sanidá y les pensiones.
Según dixo, nin Sánchez nin Rivera contestaron al documentu que-yo envío coles sos prioridaes pa gobernar. Asina, avisó que "los problemes d'España" nun son les iniciatives llexislatives populares, los aforamientos nin les diputaciones provinciales, aspectos que PSOE y Ciudadanos quieren reformar na Constitución.
Rajoy mostróse dispuestu a falar sobre aforamientu y ILPs, pero refugó dafechu suprimir les diputaciones provinciales, porque "supón dexar en situación bien complicada a los pueblos pequeños", onde los servicios los proveen por diputaciones.
El xefe del Executivu, que foi presidente de la Diputación de Pontevedra, avisó que cambiar diputaciones por comarques ye precisamente lo que siempre quisieron los nacionalistes y, amás, que va ser más caru y va xenerar más duplicidades.
Recordó qu'esa reforma constitucional nun ye posible sin el PP y criticó que tornara en vezu'l el prometer coses "sabiendo que nun puen cumplilo de nenguna manera".
Rajoy recalcó que nun lu llamó naide, nin del Ibex 35 nin de nengún sitiu, pa que permita un Gobiernu del PSOE --si lo ficiere contaríalo, aseguró-- y insistió en que'l PP va votar non por trés motivos: porque tien "un proyectu meyor", porque ganó les elecciones y porque nun pue dar vía llibre a un programa de gobiernu "col oxetivu fundamental ye liquidar lo que se fizo nos últimos cuatro años".
NON A UN PRESIDENTE INDEPENDIENTE'
Amás, refugó retirase él pa facilitar dalgún tipu d'acuerdu: "Yo nun soi una torga pal pactu, namás el PSOE nun quier pactar col PP porque considera que con 90 escaños pue presidir el Gobiernu d'España", atayó.
Ello ye que criticó "la facilidá" cola que dalgunos proponen que se retiren él y Sánchez, o que se busque un presidente independiente, o que'l Gobiernu lu lidere Albert Rivera, que quedó cuartu nes elecciones, porque "ye como dici-y a la xente que los sos votos nun valen pa nada, un disparate".
A la so manera de ver, ye bueno que'l presidente del Gobiernu "pase peles urnes y non que lu llame depués polo llisto que ye". Asina, alvirtió de que si nun se respeta la democracia cuerre'l riesgu de que "unes élites pongan a esos independientes, qu'a la media hora yá son políticos, pero sin el refrendu de los ciudadanos".
