Les redes criminales internacionales llograron nel 2015 un beneficiu d'ente 3.000 y 6.000 millones d'euros al traviés del tráficu d'inmigrantes a Europa, una cantidá que podría triplicase nel 2016 de siguir l'enclín actual, según l'ampliu informe publicáu esti llunes pola Policía Europea, Europol, onde s'identifica a casi 40.000 sospechosos de más de 100 países que trabayen como entemediarios en más de 230 puntos de tráficu per tol mundu, ente ellos Londres, Madrid o París.
Nel documentu, Europol examina les operaciones d'una nueva xeneración de redes criminales qu'esploten "la desesperación y la vulnerabilidá" d'estes persones, a les qu'ofrecen una vía d'escape de la traxedia de la guerra al traviés d'una "amplia variedá de servicios de mediación", fraudulentos dafechu y a "un preciu escesivu" que dacuando supera sobradamente los 3.000 euros.
Más del 90 por cientu del millón d'inmigrantes que llegaron a Europa emplegaron esta clase de servicios al traviés de tres rutes: dos principales -- Grecia-Balcanes ya Italia-Norte d'Europa -- y una tercera de menor intensidá al traviés d'España. Dende ehí, según Europol, entama una fola de "desplazamientos secundarios" hacia'l restu d'Europa, con Alemaña, Suecia y Reinu Uníu como destinos preferíos, na consolidación d'un enclín que "ta destinada a prosiguir nel 2016".
UN NEGOCIU ILLEGAL LLENU DE VENTAYES
El contrabandu de persones ye, a xuiciu de la Europol, un "delitu bien atractivu" porque permita llograr a los criminales unos beneficios enormes sin arriesgase descomanadamente a acabar deteníos. Ye un negociu multimillonariu que val como raigañu d'otros delitos menores como'l de la falsificación d'alta calidá de documentos, otra actividá qu'esperimentó un crecimientu estraordinariu pola actual crisis migratoria.
La Intelixencia europea ubica na so base de datos los nomes de más de 40.000 sospechosos procedentes de más d'un centenar de países, ente los que destaquen por casu Bulgaria, Exiptu, Hungría, Siria, Pakistán, Rumanía, Iraq, Túnez o Turquía. Un 44 por cientu d'estes redes tán formaes puramente por ciudadanos de países ayenos a la Unión Europea, un 30 por cientu por criminales nacíos na UE, y un 26 por cientu de calter mistu.
Estes redes operen en más de 230 "puntos calientes" repartíos poles trés principales rutes migratories antes descrites y que valen como escales pal viaxe de los inmigrantes. Europol identifica fuera de la UE a ciudaes como Amán, Arxel, Beirut, Bengazi, El Cairu, Casablanca, Istambul, Misrata o Trípoli como llugares de partida hasta la Unión Europea. Dientro de les fronteres de la UE, la Europol señala que les principales capitales europees -- Londres, París, Madrid, Roma o Atenes -- ubiquen "dalgún tipu de puntu caliente".
El costu d'un paquete de viaxe' dende Turquía hasta Libia per aire y dende Libia a Italia per mar pue algamar los 3.300 euros. Estes redes son desaxeradamente complexes. Los delincuentes empleguen negocios llegales como hoteles pa ubicar a los refuxaos pero tamién como tapaderes pa llavar el so dineru. Abonden los intermediarios, yá seya p'almacenar el dineru, pa sobornar a funcionarios d'aduanes, o pa ponese en contactu colos refuxaos al traviés de les redes sociales.
Los contrabandistes ofrecen a les sos víctimes delles modalidaes de pagu. La mayoría, un 52 por cientu, prefieren abonar el viaxe n'efectivo ellos mesmos. Un 20 por cientu recurre a un sistema conocíu como Hawala, una canal de tresferencia de fondos, tan informal como opacu, que s'emplega de manera bien avezada nel mundu árabe. La familia actúa como pagadora nun 16 por cientu de los casos. Europol indica que namás 0,2 por cientu de los inmigrantes acaben baxo esplotación llaboral.
Europol dibuxa un panorama murniu con vistes a un 2016 nel que van aumentar tolos factores que dan ales a los contrabandistes. Más fluxu migratoriu, más demanda de documentos falsificaos de gran calidá, más trabayos forzaos, y más diversificación nes rutes de contrabandu de persones.
