El cantautor Jerónimo Granda y el músicu Xuacu Amieva van compartir escenariu en Llanes, nel festival Llanes enCanta, con una llarga llista de cantautores, ente los que figuren Patxi Andión, Jabier Mugurza y Amancio Prada, ente otros.
Trátase d'un homenaxe a la canción d'autor, que va celebrase ente los díes 8 y 10 d'abril en Llanes. Según los organizadores, va tratase d'una una esposición retrospectiva y un conciertu nel que van participar importantes referentes d'esta espresión musical.
Entamada pol colectivu cultural Tertulias en Llanes, esta actividá reivindica "l'aportación de los cantautores na España de los años 70 del pasáu sieglu, un legáu artísticu y social que plantó cara al mieu y a la censura nos últimos años del franquismu pa suañar con un mundu llibre y xustu".
Xuacu Amieva y Jerónimo Granda van ser dalgunos de los asistentes a la presentación, esti vienres, de Llanes enCanta n'Uviéu. Ellos van compartir escenariu nel festival con otros referentes del cantar d'autor, como Amancio Prada, Pablo Guerrero, Luis Pastor, Javier Muguruza, Marina Rosell, Julia León, Quico Pi de la Serna, Patxi Andión y Elisa Serna.
