Mario Rojas y Pablo Lorenzana firmen les fotografíes a partir de les que l’autor ayerán reflexona y afonda hasta descubrir la verdá interior de cada instante
La editorial Publicaciones Ámbitu acaba de sacar a la cai’l llibru L’alma
robada, del escritor ayerán Pablo Texón, que pue adquirise nes llibreríes y na tienda
on line d'Ámbitu (tienda.ambitu.com). Texón presenta nesti volume catorce testos
en prosa poética basaos n’otres tantes semeyes de los fotoperiodistes Mario Rojas
y Pablo Lorenzana.
Sorprender un instante, y dexalu quietu na inquieta harmonía, son característiques
comunes a dos disciplines mui diferentes: la fotografía y la prosa poética. En L’alma
robada, Pablo Texón demuestra toles sos habilidaes al acudir dacuando al rellumu
poéticu intelixente, dacuando a la ocurrencia refexiva. Son testos qu’aspiren a descubrir
la verdá interior de les coses. A partir de les fotografíes magnífiques de Mario
Rojas y Pablo Lorenzana, Texón fai que veamos más adientro.
Tal como observa Ricardo Saavedra nel prólogu del llibru, l’autor d’obres como Singularidá
o Catedral «garra una semeya de l’actualidá inmediata y conviértela n’artefactu
lliterariu, nun testu onde les palabres esvanecen, dexen de ser llinguaxe y enayénense
en mundu: creen una imaxe nueva, plena y suficiente. Los güeyos del
autor miren llateralmente les coses, penetrándoles. Posen sobre’l documentu gráficu
que-y proponen, pero en realidá tan mirando acullá».
Ente les imáxenes, atópense fotografíes d’acontecimientos de l’actualidá informativa,
como’l pieslle de la fábrica de lloza de San Claudio, el rodaxe n’Uviéu de la película
de Woody Allen Vicky, Cristina, Barcelona o una manifestación pola oficialidá del
asturianu, pero tamién hai otres que dirixen l’oxetivu pa situaciones cotidianes,
como un méndigu arrodiyáu, un trabayador inmigrante o una fiesta de prau. Sobre
toes elles Texón enfoca una lluz intuitiva que rescampla na so prosa, una lluz que proyecta
una sombra: la intelixencia.
Pablo Texón Castañón (Felechosa, Ayer, 1977) revelóse como una de les promeses
con más futuru dientro de la lliteratura asturiana cola publicación del poemariu
Toles siendes (2005), merecedor del premiu Nené Losada Rico 2003, unes promeses
que se vieron cumplíes cola publicación del llibru La culpa y la lluz, col que ganó’l
Premiu Teodoro Cuesta de poesía nel 2006. Amás de la poesía, tien tocao xéneros
como la narrativa –con llibros como Catedral o, esti mesmu añu, Singularidá– y el
rellatu periodísticu, que-y valieron premios como’l de la Tertulia El Garrapiellu, Fernández
Lema, Cartes d’Amor o Art Nalón. Ye tamién el traducctor del textu de Xulia,
el montaxe que con tantu éxitu representó Teatro Margen de la obra d’August
Strindberg.
Mario Rojas (Madrid, 1969) trabaya como fotógrafu pal diariu El Comercio. Amás,
tien espuesto en delles ocasiones les imáxenes, encuadraes dientro del documentalismu
fotográficu, que saca nos sos viaxes, ente elles dalgunes sobre la vida nos
campamentos de refuxaos saharauis.
Pablo Lorenzana (Uviéu, 1971) estudió fotografía na Escuela d’Arte d’Uviéu. Trabayó
como fotógrafu en La Nueva España y n’El Comercio y, dende hai años, desenvuelve’l
so llabor en La Voz de Asturias. Espón regularmente’l so trabayu, xunto a los sos compañeros
de l’Asociación de Fotoperiodistes d’Asturies, nes muestres anuales de Miraes.
