Podemos presentó güei un documentu col so programa de Gobiernu nel que prevé tornar los recortes que se ficieron n'España dende l'añu 2010 y implantar un programa de bienestar social y modernización económico, qu'incluya una renta garantizada y nueves inversiones públiques, con una dotación de 24.000 millones de gastu añal.

   El partíu que dirixe Pablo Iglesias plantega llevar a cabu una nueva política económica na que nun s'amenorgue'l gastu públicu, sinón tolo contrario. Nel documentu que presentó güei y apurrió al PSOE pa negociar, prevése que'l gastu públicu puea aumentar en 96.000 millones pal añu 2019. Na so mayoría diríen destinaos a gastu social, dao que prevé destinar 35.000 millones más a Educación y Sanidá; 30.000 millones más a protección social (con meyora de pensiones, dependencia y renta garantizada) y namás 3.000 millones más a la transición enerxética, I+D+i, y otres inversiones públiques.

   Podemos prevé llograr esi gastu de casi 10 puntos más de PIB pa dientro de trés años per mediu de la llucha contra'l fraude, del que prevé llograr 12.000 millones; una reforma fiscal cola que recaudaría 28.000 millones más y que recayería sobre les "rentes más acomodaes y sobre los sectores de población con mayor patrimoniu; l'efectu multiplicador" deriváu del "efectu espansivu" de la política presupuestaria, con un impactu d'unos 29.700 millones d'euros.

   Pa equilibrar la recaudación --de la que faltaríen 26.300 millones-- col aumentu de gastu, Podemos propón un nuevu calendariu de reducción del déficit públicu y pa ello quier qu'España promueva, en coordinación con otros países de la UE un procesu de negociación nel senu de la UE pa "flexibilizar" l'aplicación del Pactu d'Estabilidá y Crecimientu.

   La so propuesta, en comparanza col déficit, ye que la so reducción se modere y se retrase, y anque prevé que baxe en tolos años de la Llexislatura, namás s'asitie perbaxo del 3 por cientu nel 2018 y nel 2,2 nel 2019. Esto ye lo que daría un marxe equivalente a 26.300 millones d'euros.

   Ello ye que nel testu déxase claro que "frente a les esixencies" de la Comisión Europea, el Gobiernu del qu'ellos quieren formar parte "nun va amenorgar" el gastu total del Estáu yá presupuestáu pal 2016 y tampoco va amenorgar nenguna de les partíes qu'afecten a servicios públicos fundamentales. Y contempla presentar nel Parlamentu "una propuesta de creitos estraordinarios" p'atender les prioridaes sociales del 2016.

   Sicasí, nel documentu espliquen que la evolución del déficit ye "compatible" con un amenorgamientu progresivu del pesu de la deuda sobre'l PIB, que s'asitiaría, según los sos cálculos, nel 91 por cientu nel 2019.

REESTRUCTURAR LA DEUDA POLES AYUDES AL SECTOR FINANCIERU

   Amás, van promover la derogación de la Llei Orgánica d'Estabilidá Presupuestaria y van entamar un procesu de cambiu del artículu 135 de la Constitución española pa, diz el testu, "que nun se priorice'l pagu de la deuda penriba de cualuqier otra consideración de política económico, y pa garantizar la financiación de los servicios públicos fundamentales".

   Podemos tamién plantega promover la "reestructuración" de la deuda vinculada a les ayudes públiques al sector financieru, el memorandu d'entendimientu y el rescate de la UE y quier que les instituciones financieres participen na devolución de los 60.000 millones del rescate aprobáu nel 2012 pa España al traviés d'un impuestu de solidaridá transitoriu.

SUBIDA DEL IRPF Y BAXADA DEL IVA P'ALIMENTOS Y CULTURA

   Tocantes a la reforma fiscal, va suponer un aumentu de la tributación pa les rentes superiores a 60.000 euros de base imponible. Va aumentase'l númberu de tramos del IRPF y el tipu marxinal de cada tramu dende'l 45 por cientu hasta un 55 por cientu pa rentes superiores a 300.000 euros añales.

   Tamién quieren: correxir progresivamente la dualidá de la tarifa ente rentes del trabayu y aforru nel IRPF coles mires d'avanzar hacia "una tarifa única"; revisar los beneficios fiscales del IRPF y Sociedaes; eliminar el réxime d'estimación oxetiva pa les actividaes económiques; reformar l'impuestu de sociedaes con tipos efectivos del 30 por cientu; recuperar y revitalizar l'impuestu sobre la riqueza, socesiones y donaciones y modificar el mínimu exentu en Patrimoniu.

   Amás, preven un tipu superreducíu del 4 por cientu d'IVA p'alimentos y bebíes non alcohóliques, l'amenorgáu del 10 por cientu pa consumu enerxéticu y baxar l'IVA pa productos culturales. Amás, una fiscalidá del 25 por cientu p'artículos de luxu.

   Xuntu con ello, quieren regular la fiscalidá de les Sicav, controlando situaciones de fraude, verificando'l númberu real de socios y estableciendo un periodu máximu de permanencia pa les plusvalíes acumulaes. Podemos quier establecer tamién una fiscalidá verde, con una reforma del impuestu sobre hidrocarburos y de vehículos, asina como establecer un impuestu sobre transacciones financieres.

DEROGAR LES DOS ÚLTIMES REFORMES LLABORALES

   En materia llaboral, Podemos plantega, ente otres cuestiones: aumentar el salariu mínimu hasta 950 euros a lo últimos de la Llexislatura; realizar un nuevu Estatutu de los Trabayadores que derogue los dos últimes reformes llaborales; reformar la contratación llaboral y a tiempu parcial de manera que los contratos d'obra o serviciu de más d'un añu tornes n'indefiníos; modificar la regulación por despidu, recuperando la figura del despidu nulu por fraude de llei y reforzando la causalidá por razones económiques, productives, técniques y organizatives, ya incluyendo como obligatoria l'autorización gubernamental pa los ERE.

   Amás, proponen que los convenios sectoriales tengan preeminencia sobre los d'empresa; más medios pa la inspección de trabayu; regular les hores estra; aplicar el modelu alemán nel que la perda de xornada llaboral vese compensada en términos salariales pol Estáu; regular el trabayu "parallaboral" o de los becarios y eliminar el contratu pa entamadores.

RENTA GARANTIZADA DENDE 600 A 1.290 EUROS

   Pa compensar los baxos salarios y l'aumentu de la desigualdá dende qu'españó la crisis, Podemos propón un programa de renta garantizada que va contar d'una renta diferencial (complementaria de los ingresos esistentes) pa llares con ingresos perbaxo de la llenda de la probeza de 600 euros mensuales, que va aumentar en función del númberu de miembros hasta un máximu de 1.290 euros y una renta complementaria pa trabayadores con baxa remuneración pa garantizar unos ingresos mínimos de 900 euros mensuales.

   En materia de pensiones, quieren restablecer la edá de xubilación en 65 años, recuperar la indexación de les pensiones al IPC, introducir la financiación pela vía impositiva, aumentar l'importe de les pensiones non contributives y eliminiar el tope máximu de cotización.

   Tocantes a los desahucios, quieren promover una llei orgánica que prohíba los desahucios forzosos sin alternativa habitacional, establecer la dación en pagu y con calter retroactivu, asina como la limitación de la responsabilidá del deudor hipotecariu al bien hipotecáu; garantizar el derechu a los suministros básicos d'agua, lluz y gas; asegurar l'alquiler estable.