López fizo esti anunciu na rueda de prensa posterior a la xunta que caltuvo nel so despachu del Congresu per espaciu de media hora col candidatu socialista a la Presidencia del Gobiernu propuestu pol rei.

   La tercer autoridá del Estáu esplicó que se comprometió cola Mesa de la Cámara a poner fecha esta mesma selmana a esi Plenu d'investidura, fecha que yá treslladó a los miembros d'esti órganu.

   Cuando'l pasáu 2 de febreru Felipe VI designó a Sánchez pa tratar de formar Gobiernu, el mesmu candidatu socialista pidió al presidente del Congresu un plazu de trés selmanes a un mes pa tratar de buscar los apoyos necesarios pal so investidura, un tiempu que López xulgó como "razonable".

SÁNCHEZ TIEN DOS SELMANES PA ZARRAR UN PACTU

   Ello ye que cola elección del 2 de marzu como día pal entamu del Plenu d'investidura, según dixo'l presidente de la Cámara, cúmplese xusto un mes dende que'l rei propunxera al candidatu socialista, que tamién ve "razonable" esa fecha. Sicasí, fontes socialistes reconocieron a Europa Press qu'esperaben que l'alderique tuviera llugar unos díes dempués.

   Cola fecha propuesta pol presidente del Congresu, el PSOE tendrá qu'entainar les negociaciones, dao que Sánchez comprometióse a consultar a la militancia cualquier posible acuerdu con otros partíos antes de sometese a la investidura. Amás, esi hipotéticu pactu tamién tien que salir refrendáu pol Comité Federal del partíu.

   Anque'l PSOE nun convocaría esa consulta hasta zarrar el pactu en cuestión, la fecha a lo último marcada podría llevar la votación de les bases al sábadu 27 de febreru, dao que fontes socialistes refugaron como día hábil nesti calendariu internu'l domingu 28, Día d'Andalucía.

   Asina, el 2 de marzu va empezar l'alderique d'investidura de Sánchez, que va prollongase mientres dos díes. El miércoles el candidatu va esponer el so programa de gobiernu sin llende de tiempu y, de siguío, van ser los voceros de los distintos grupos parlamentarios los que van tomar la palabra mientres 30 minutos.

   L'aspirante a La Moncloa va decidir si respuende un por ún o de forma arrexuntada, teniendo los representantes de cada grupu derechu un retruque de diez minutos.

LA SEGUNDA VOTACIÓN SERÍA EN SÁBADU

El xueves, día 3, una vez qu'intervinieren toles fuerces parlamentaries, va procedese a la votación. Si l'aspirante llogra l'apoyu de la mayoría absoluta (176), va entendese otorgada la confianza.

Si nun llogra, polo menos, la metá más ún de los votos, va fixase una nueva votación 48 hores dempués de l'anterior, esto ye, el sábadu 5 de marzu. Nesti sen, el presidente del Congresu quitó importancia a qu'esa votación tenga llugar el fin de selmana porque "nun sería la primer vez qu'esto pasa".

   Llegáu'l casu, al líder socialista va basta-y con llograr una mayoría simple d'apoyos, esto ye, más votos a favor qu'en contra. En casu de salir escoyíu sería'l rei'l que formalizaría esi nomamientu.

DOS MESES DE PLAZU MÁXIMU

   Si nun consiguiera salir investíu nesti segundu intentu, el monarca plantegaría socesives candidatures que se tramitaríen pel mesmu procedimientu hasta acabar el plazu máximu de dos meses dende la primer votación d'investidura, hasta'l 3 de mayu.

   Si nesi periodu de tiempu nengún candidatu a la Presidencia llogra la confianza del Congresu, habría que convocar nueves elecciones. Nesi casu, el presidente de la Cámara Baxa sometería a la firma del rei'l decretu de disolución de les Cortes y de convocatoria de los comicios, una circunstancia ésta qu'hasta agora nun se dio nunca.

   Les elecciones xenerales celebraríense'l domingu 26 de xunu, esto ye, 54 díes dempués del decretu de convocatoria d'elecciones, como asina lo establez la Llei Orgánica del Réxime Electoral Xeneral (Loreg).