Sánchez tien yá una "pequeña idea", con nomes y apellíos, de cuál sería'l so Gobiernu, que quier que seya unu, non dellos, y que seya paritariu. "Nun partu de la concepción de que'l PSOE tien que formar un Gobiernu monocolor, vamos velo col restu de formaciones polítiques", dixo. De camín, recordó qu'amás de Podemos y Ciudadanos hai otres fuerces como IU o Compromís.

   Según diz, él trabaya pa tornar en presidente del Gobiernu nuna sesión d'investidura a primeros de marzu y qu'él nun se zarra a coaliciones.

   El líder socialista espresóse asina nuna entrevista en '20 minutos', recoyida por Europa Press, na qu'asegura que "van creciendo" los apoyos que, en forma de 'sís' o astenciones, pue tener pa la investidura, anque nun desvela nengún. Y diz que dellos partíos falen d'investidura y otros tán abiertos a falar de la llexislatura.

   Eso sí, agradez a los partíos que se reunieron con él la so disposición al diálogu y asegura qu'al secretariu xeneral de Podemos, Pablo Iglesias, ta "esperándolu" pa sentase a axustar, non de "sillones", sinón d'un programa de Gobiernu.

   Según diz, la última vez que faló con Iglesias foi'l miércoles y díxo-y que "tien la puerta abierta", asina que'l motivu pol que nun hai fecha tovía pa que se reúnan los equipos negociadores ye daqué qu'hai que preguntar a él. "Tien la puerta abierta y cuando él diga que quier sentase a negociar con nós sobre propuestes de Gobiernu fairémoslo encantaos", insistió.