El secretariu de Defensa estaounidense, Ashton Carter, va incidir na necesidá de que s'espleguen fuerces terrestres p'apoyar l'actual campaña militar contra l'Estáu Islámicu na xunta que convocó esti xueves na sede de la OTAN en Bruxeles de los países de la coalición internacional contra'l grupu terrorista n'Iraq y Siria que lidera Estaos Uníos.
"El déficit más significativu son les fuerces terrestres. La capacidá d'esplegar fuerces militares terrestres significatives en conxunción cola potencia de fueu aereu de la coalición ye la capacidá clave que tamos intentando articular", daqué que "va sorrayar" esti xueves el xefe del Pentágonu, esplicó en rueda de prensa l'embaxador estaounidense ante la OTAN, Douglas Lute.
El presidente estaounidense, Barack Obama, autorizó n'ochobre pasáu l'esplegue d'un pequeñu continxente de fuerces especiales estaounidenses en Siria p'asesorar y asistir a les fuerces llocales que combaten al Estáu Islámicu.
Arabia Saudina, Emiratos Árabes Uníos y Bahréin abrieron la puerta al posible envíu de fuerces militares a Siria como parte de los esfuerzos de la coalición internacional pa ganar al Estáu Islámicu.
"Hai una sensación de qu'agora ye'l momentu de cubrir los déficits de capacidaes ya intentar facer el máximu progresu posible nel 2016 (contra l'Estaos Islámicu). Hai munchu trabayu por facer", almitió Lute, qu'insistió en que nun se ficieron "progresos bastantes" contra la organización terrorista.
"La xunta va centrase na campaña militar (contra l'Estáu Islámicu). Centraráse sobremanera nos países que tán contribuyendo a la campaña militar o puen posiblemente dar dalgún apoyu a esti esfuerzu", esplicaron fontes diplomátiques estaounidenses, que precisaron que la cita va dar siguimientu a la xunta de la coalición internacional convocada pol xefe del Pentágonu en xineru en París.
Entós, los ministros de Defensa de Francia, Alemaña, Italia, Países Baxos, Reinu Uníu, Estaos Uníos y Australia acordaron "entainar ya intensificar la campaña" contra l'Estáu Islámicu pa ganar a la organización terrorista.
Países Baxos comprometióse a sumase a los ataques aéreos contra l'Estáu Islámicu en Siria, mientres que Canadá anunció esta selmana que va poner fin a los sos bombardeos en Siria ya Iraq el 22 de febreru pero va triplicar el so asesores militares esplegaos n'Iraq pa entrenar a les tropes curdes, que van pasar d'unos 70 a 230, y va dexar dos aviones de vixilancia y unu de repostaxe.
