Madrid (E.P.).-El PP asitió a Rita Barberá na Diputación Permanente del Senáu, polo que la exalcaldesa de Valencia nun va perder l'aforamientu nel casu de que se disuelvan les Cortes por una nuevu convocatoria d'elecciones xenerales.

   Según confirmaron a Europa Press nel grupu parlamentariu, Barberá va formar parte como suplente d'esti órganu del Senáu, que ye'l que da continuidá al parlamentu ente periodos de sesiones y ente llexislatures. Ta compuestu por 35 miembros que caltienen la condición de senadores tovía dempués d'acabáu'l so mandatu o disuelta la Cámara.

   El PP dexó a lo último a Barberá sin la presidencia de nenguna comisión, dempués de que-y concediera la de la Comisión Constitucional na pasada llexislatura, en llegando dende Valencia al perder l'alcaldía de la ciudá.

   Sí va ocupar escañu como vocal en dos comisiones, precisamente la Constitucional y tamién na d'Economía, amás de tener plaza na Diputación Permanente. Toos estos órganos constitúyense güei y nel grupu parlamentariu desconozse si Barberá va asistir, según dixo'l voceru, José Manuel Barreiro.

OTROS CASOS

   Barberá nun ta investigada nin imputada por nengún tribunal nin ta rellacionada cola operación Taula, na que tán implicaos los conceyales del grupu municipal del PP nel Conceyu de Valencia.

   Barreiro insistió nesti fechu esti martes y defendió la presunción d'inocencia. Dende la dirección nacional del PP déxase claro tamién que la exalcaldesa nun ta imputada, pero esíxense-y esplicaciones públiques y optóse por nun da-y más visibilidá nel Senáu.

   Na pasada llexislatura, el PP tamién dio un escañu na Diputación Permanente a l'a exalcaldesa de Xerez María José García-Pelayo, investigada por supuestes irregularidaes na contratación del puestu de Fitur del 2004 a la trama Gürtel. Agora ye diputada nel Congresu y el so casu sigue nel Tribunal Supremu.