El voceru señaló en concreto l'acuerdu con Francia que dexa a los axentes de fronteres británicos facer controles d'inmigración al otru llau de la canal de La Mancha. "Tenemos esa relación con Francia en parte porque dambos somos socios na UE. Si vamos de la UE nun hai garantíes de que puedan siguir esos controles", apuntó.

   "Si nun existen esos controles, sabemos qu'hai miles de persones ellí que quieren venir a Reinu Uníu y qu'entós vendríen a Reinu Uníu (...). Nun habría nada que torgara a la xente cruzar la canal peles nueches", argumentó.

   Poco dempués, el mesmu Cameron apoyó l'argumentu en rueda de prensa. "Si (...) quedamos nuna Europa con reformes sabemos lo que podemos consiguir. Sabemos que la frontera va siguir en Calais, sabemos que tenemos un asientu pa decidir les regles pal futuru d'Europa, sabemos que tenemos la información vital sobre terroristes y criminales porque formamos parte d'eses organizaciones", argumentó.

   En Francia hai "un montón de políticos de la oposición" a los que-yos prestaba acabar con esi acuerdu, lo qu'abriría les puertes a miles de refuxaos que viven en Calais. "Nun quiero dar a naide una escusa pa facelo", repostió.

   Dende Francia, voces como la de l'alcaldesa de Calais, Natacha Bouchart, criticaron esta situación y piden que la frontera británica vuelva tar al otru llau de la canal.

   Dende los sectores más euroescépticos, inclusive dientro del partíu de Cameron, el Partíu Conservador, denunciaron esti tipu d'alvertencies "del mieu". "El primer ministru recurre agora al alarmismu", afirmó Arron Banks, cofundador de la camapaña Leave.EU (Salida.UE).

   "L'acuerdu que tenemos pa los emigrantes de Calais ye con Francia, non cola UE. Nun hai motivu pa qu'esto cambie al salir de la UE", argumentó Banks.