Na so decisión, fecha pública per un comunicáu, soliciten a Suecia y Reinu Uníu qu'evalúen la situación d'Assange "pa garantizar la so seguridá ya integridá físico, facilitar l'exerciciu del so derechu a la llibertá de movimientos y garantizar que goza dafechu de los sos derechos garantizos poles normes internacionales sobre detención".

   El testu repasa'l casu del fundador de Wikileaks recordando que tuvo diez díes n'aislamientu n'avientu del 2010 nuna prisión británica a pidimientu del fiscal suecu, y dempués quedó en llibertá baxo arrestu domiciliariu mientres 550 díes antes de solicitar asilu a Ecuador y refuxase na so Embaxada en Londres en xunu del 2012.

   Nesti tiempu, según los espertos, a Assange "sometiéronlu a delles formes de privación de llibertá: la detención inicial na prisión de Wandsworth siguida pol arrestu domiciliariu y el so confinamientu na Embaxada ecuatoriana".

   "Tres considerar qu'hubo una privación continuada de la llibertá, el Grupu de Trabayu tamién consideró que la detención foi arbitraria porque tuvo baxo aislamientu mientres la primer fase de la detención y pola falta de dilixencia del fiscal suecu nes sos investigaciones, que tuvieron como resultáu la prollongada detención d'Assange".

   Sicasí la decisión nun foi unánime. Según precisó'l Grupu de Trabayu nel so comunicáu, una de los sos miembros, de nacionalidá australiana como Assange, "nun participó nes deliberaciones", mientres qu'otru miembru "tuvo en desacuerdu cola postura de la mayoría y consideró que la situación d'Assange nun ye de detención y poro queda fuera de les competencies" d'esti ente.

   La decisión, adoptada en solicitando'l mesmu Assange l'allugamientu del Grupu d'Espertos, yá fuera adelantrada esti xueves pola BBC y confirmada darréu pol Gobiernu suecu. De la mesma, el Gobiernu británicu argumentó que Assange nun ta deteníu, sinón qu'evitó precisamente'l so arrestu de forma voluntaria" al permanecer na Embaxada d'Ecuador en Londres.

   Coles mesmes, la Policía británica alvirtió de que "la orde d'arrestu sigue a valir", mientres que los fiscales suecos esclararon que lo que digan los espertos de la ONU "nun tien un impactu formal na investigación en cursu" contra Assange.

   Sicasí, antes de dar a conocer esti vienres, el resultáu de la so investigación, el Grupu d'Espertos esclaró nun videu que la so decisión ye "llegalmente vinculante".

Foto: PAUL HACKETT / REUTERS