El Parlamentu vascu dio'l preste a la tramitación de la llei de consultes propuesta por EH Bildu, cola que la coalición pretende facilitar que los ciudadanos d'Euskadi puean "decidir" sobre'l so futuru políticu, económicu y social sin "imposiciones". La toma en consideración del testu, contra la que votaron el PSE-EE, PP y UPyD, recibió l'apoyu del PNV, anque esti partíu criticó la "enrevesada" regulación propuesta por EH Bildu.
Una vez aprobada la toma en consideració nde la iniciativa, ésta va empezar el procesu de tramitación avezáu de les propuestes llexislatives nel Parlamentu vascu, anque dau l'escasu marxe de tiempu existente hasta'l final de la llexislatura, previstu pa seronda, paez complicáu que la llei puea salir alantre primero qu'acabe l'actual mandatu autonómicu.
La iniciativa de la coalición soberanista, oficialmente denominada 'Proyectu de Llei d'Empoderamientu de la Ciudadanía d'Araba, Bizkaia y Gipuzkoa', pretende dotar a les instituciones vasques d'una cobertoria llegal que permita celebrar consultes de calter llocal, provincial o autonómicu.
L'oxetivu d'EH Bildu ye que los ciudadanos d'Euskadi puean decidir el so futuru "políticu, económicu y social" sin "imposiciones" per parte del Estáu español, de les instituciones europees o de los grandes grupos de presión formaos poles compañíes multinacionales.
