El vicesecretariu Sectorial del PP, Javier Maroto, acusó esti miércoles al líder del PSOE, Pedro Sánchez, de "faltar a la verdá" porque'l so plan de formar gobiernu ta "condenáu al fracasu" y afirmó que si'l PP facilitara la so investidura taría "humildando" a los sos siete millones de votantes.
Pa Maroto "si ye verdá que Sánchez va respetar les llinies coloraes qu'él mesmu se punxo y que-y punxo el so partíu, nun aceptar l'astención de los independentistes", y ye cierto que Podemos y Ciudadanos son incompatibles, como dicen los sos líderes, Sánchez "nun tien nenguna opción de sumar".
Y, tovía sin dicilo espresamente, dexó claro que'l PP nun va facilitar esi gobiernu, porque "va tratar de respetar a los sos propios votantes" y poro ye razonable qu'intente formar Gobiernu.
Nesti sen, alvirtió de que si a Sánchez paeció-y una "humildación a los sos votantes" que Podemos, con menos votos que'l PSOE, reclamára-y la vicepresidencia, lo mesmo val pa los votantes del PP, que tán viendo cómo'l PSOE, con menos votos, quier quitar la presidencia.
Maroto nun precisó cuándo va falar el PP con otres fuerces polítiques nin si él va formar parte del equpu negociador, anque almitió qu'él tien esperiencia nesi campu de cuando yera alcalde de Vitoria.
El dirixente 'popular' avisó qu'España nun precisa un Gobiernu que namás puea sumar el primer día pero depués nun puea gobernar, y dixo tarrecer que Sánchez salga escoyíu "engañando a dalgunos y faciendo que'l resultáu seya una pura carambola" pero dempués nun puea facer nenguna reforma.
Maroto reprochó al PSOE'l so refugu a permitir un Gobiernu del PP y calificó esa posición como "de bloquéu" y contraria a los intereses del PSOE y d'España. El PP, dixo, sigue convencíu de que "la única opción y la bona opción" ye esi gobiernu d'amplia base. Según dixo, el PP va tar "sentáu a la mesa siempre".
Eso sí, nun quiso aventurar qué consecuencies pue tener pal PP y pal so presidente, Mariano Rajoy, el fechu de que puea acabar gobernando'l PSOE. "Primero la xente de la cai y dempués la del partíu", atayó.
Al so xuiciu, 40 díes dempués de les elecciones les families tienen que pensar que los políticos tán "na guardería" y son incapaces de buscar alternatives de sen común pa dar estabilidá. Maroto recordó qu'él votó, como diputáu vascu, al socialista Patxi López como 'lehendakari' "por razones d'Estáu" y pidió-y a Sánchez que piense nel so país más que na so propia "siya".
