La cuenta oficial de Podemos Zaragoza en Twitter publicó'l llunes un mensaxe con un esquema de Gobiernu de coalición ente'l PSOE y la formación morada, repartu de cartera incluyida, y darréu suprimióla "pa evitar confusiones" porque "nun yera en nengún casu una propuesta oficial del partíu", según dixo n'otru 'tuit'.
L'esquema publicáu asitiaba, amás d'a Pedro Sánchez na presidencia y a Pablo Iglesias na vicepresidencia, a Íñigo Errejón como ministru d'Interior y al númberu dos del PSOE, César Luena, como ministru d'Agricultura, Alimentación y Mediu Ambiente.
La cartera d'Economía, Facienda y Competitividá correspondería al diputáu d'IU Alberto Garzón, mientres que la de ministru d'Industria y de vocera de Gobiernu sería pal actual voceru parlamentariu socialista, Antonio Hernando.
Tamién seríen pa Podemos les carteres de Defensa (José Julio Rodríguez), Asuntos de Plurinacinalidá (Xavier Domènech), Xusticia (Victoria Rodríguez) y Sanidá, Servicios Sociales ya Igualdá (Carolina Bescansa).
Asina, Podemos tendría seis miembros nesi gabinete, frente a siete del PSOE y unu d'IU. Los otros socialistes seríen Meritxell Batet (Empléu y Seguridá Social), Mari Luz Rodríguez (Educación, Cultura y Deporte), Antonio Pradas (Esteriores y Cooperación) y María González Veracruz (Fomentu).
