Un ciudadanu español enroláu nes files de les milicies curdes apaez nun videu llamando n'español a unise a la causa pola autodeterminación del Kurdistán. "El nuesu llugar como revolucionarios ye equí, lluchando y arrimando l'hombru cola xente que ta resistiendo, colos compañeros que quieren lliberar el Kurdistán y el Mediu Oriente", diz.
"Llamamos a tolos revolucionarios a unise y a mostrar la so solidaridá. Unámonos contra les fuerces imperialistes, agora ye'l momentu. ¡A les barricaes! Ven a Kurdistán a lluchar col YPS, YPG y la guerrilla", anima en perfectu castellanu.
El videu al que tuvo accesu Europa Press detectólu AICS, empresa dedicada a monitorizar esti tipu de movimientos. El mozu sal cola cara tapada por una 'kufiya' (pañuelu palestín) y con ropes militares. Xunto con él hai dellos mozos y tán arrodiaos por delles persones que llucen pañuelu asemeyáu. El mozu diz que llegaron ellí "de forma llibre y voluntariamente".
"Apoyamos y almiramos el llabor del PKK (Partíu de los Trabayadores del Kurdistán, consideráu una organización terrorista tantu pola UE como por EEUU). La revolución de Kurdistán inspirónos y queremos espandila pol restu del mundu. Kurdistán ye namás el principiu", añade esti mozu nun discursu ante tolos presentes que-y escuchen cuando fala. Acusa tamién a Turquía de ser "aliáu del Estáu Islámicu" y de "masacrar a la población civil".
Según l'analís realizáu por AICS, esti videu publicáronlu los miembros estranxeros del YPG (les milicies curdes) y afirma que'l mozu que fala ye español mientres que los dos que lu escolten falen inglés y alemán. Toos son parte de la Brigada Internacional del YPG.
Les milicies curdes son unes de les fuerces que s'enfrenta al Estáu Islámicu en Siria ya Iraq. El videu tien fecha del 27 de xineru, según AICS, el mesmu día nel que la Policía Nacional detenía na operación 'Valle' a nueve persones acusaes de formar parte d'una rede que captaba combatientes pa enviar a les files curdes. Nel videu nun se fai nenguna mención a estes detenciones.
Los deteníos son ocho españoles y un turcu. La mayoría formaba parte del colectivu 'Reconstrucción Comunista' y van declarar esti vienres ante'l xuez de l'Audiencia Nacional. Según confirmaron a Europa Press fontes de la investigación, nos rexistros posteriores a los sos arrestos topó una supuesta "sustancia sospechoso" que va analizase pa comprobar si podría ser utilizada pa la fabricación d'esplosivos, too ello según la versión del Ministeriu del Interior. Tamién lo que la Policía considera "delles armes blanques".
