Polo menos 18 persones morrieron, ente elles nueve neños, pol naufraxu d'una embarcación na qu'un grupu de refuxaos intentaba llegar dende les costes de Turquía hasta les de Grecia, según un balance provisional fechu públicu pola ONG Médicos Sin Fronteres (MSF).
Un home que llogró llegar a nadu a la isla de Samos foi'l que dio la voz d'alerta'l miércoles de nueche, según el periódicu 'Protothema'. Un voceru de la Guardia Costera citáu pola axencia Reuters aseguró qu'a bordu de la embarcación diben "ente 40 y 45 persones".
Efectivos de Frontex y de la Guardia Costera griega caltienen abierta una operación de busca y llograron recuperar con vida polo menos a nueve persones. "Nun tamos seguros de si estos nueve formen parte de los 45 o d'otra embarcación distinta", almitió'l voceru.
La Organización Internacional pa les Migraciones (OIM) alertó'l martes de qu'esti añu llegaron per mar a Grecia más de 45.000 inmigrantes y refuxaos, 31 veces más de los datos rexistraos mientres tol mes de xineru del 2015. Nueve de cada diez vienen de Siria, Iraq y Afganistán, les úniques trés nacionalidaes a les que Macedonia permite acceder al so territoriu.
La organización estima qu'esti añu yá morrieron sobre 180 persones intentando algamar les mariñes europees, más del doble que nel mesmu periodu del 2015.
La OIM, l'Altu Comisionáu de la ONU pa los Refuxaos (Acnur) y otres 65 organizaciones pidieron a la comunidá internacional 550 millones de dólares (unos 508 millones d'euros) pa siguir faciendo frente a la emerxencia.
Foto: ALKIS KONSTANTINIDIS/REUTER.
