El secretariu xeneral del PSOE, Pedro Sánchez, volvió dar un "non atayante" esti miércoles al presidente del Gobiernu en funciones, Mariano Rajoy, pa la so investidura y esplicó que va tratar de liderar una alternativa, tendiendo la mano "a izquierda y derecha", si asina se-y pide.
Asina lo señaló en declaraciones a los periodistes nel Senáu, a onde acudió p'asistir a los actos conmemorativos en memoria del Holocaustu, mientres empieza nel Palaciu de la Zarzuela la segunda ronda de conversaciones del rei colos partíos pa la formación del Gobiernu, dempués de que Rajoy tornara'l pidimientu que-y fizo al acabar la primera.
Sánchez refugó asina l'apoyu de los socialistes a una investidura del PP y insistió en que va tratar de conformar un gobiernu. "Lo que nos tán pidiendo millones d'españoles ye que'l PP dexe de ser gobiernu, que refaigamos la vida democrática nel país, y voi tender la mano a izquierda y a derecha pa liderar, nel casu de qu'asina se me pida, una alternativa que refaiga la vida democrática nel país", dixo.
Asina respondió cuando se-y plantegó si'l PSOE podría astenese pa que Rajoy salga investíu, como defendió l'expresidente Felipe González. Sánchez insistió en que "millones d'españoles" quieren que'l PP "dexe de ser gobiernu", pa poner "fin a la corrupción que tanta vergüenza ta causando". "El fedor empieza a ser insoportable", dixo.
Ello ye qu'avisó a "toles fuerces polítiques que quieran refacer la vida democrática" n'España de que, pa esto, tien que "cumplise una condición necesaria" y ye que "el PP pase a la oposición". "Sin el PP na oposición ye imposible refacer la vida democrática nel nuesu país", insistió.
NON A LA ÚLTIMA UFIERTA DE "ENTENDIMIENTU" DEL PP
Sánchez refugó tamién la propuesta de "entendimientu" que-y fizo'l xefe del Executivu en funciones esti miércoles, ofreciendo al PSOE apoyu en comunidaes autónomes y conceyos en cuenta de un pactu nacional.
"Dende equí dígo-y non, un non dafechu. Colos gobiernos autonómicos, colos gobiernos municipales nun se xuega", afirmó, pa dempués avisar a Rajoy de que la so "desesperación" nun pue "llevar tamién a la instrumentalización" de les instituciones.
Al so xuiciu, el líder del PP "equivócase" porque "vuelve falar de sillones y non de soluciones". "El señor Rajoy vuelve pensar que la única solución pa España ye caltenese él nel sillón de La Moncloa y yo dígo-y que non, que Rajoy ye parte agora mesmo del problema", dixo.
