El presidente del Gobiernu en funciones, Mariano Rajoy, aseguró esti miércoles que si hai un acuerdu ente PP, PSOE y Ciudadanos "a nivel nacional" pa formar Gobiernu, puede haber tamién un pactu qu'afecte a les comunidaes autónomes y los grandes conceyos, onde nesti momentu los socialistes cuenten col apoyu de Podemos. Al so entender, eses "formules d'entendimientu" ente los dos grandes partíos daríen "estabilidá" y permitiríen poder gobernar.
Asina se pronunció nuna entrevista en Telecinco, recoyida por Europa Press, onde aseguró que'l pactu que pretende'l líder del PSOE, Pedro Sánchez, "puede facese" porque "los númberos lleguen numbéricamente" pero "ye invidable" y ta "condenáu al fracasu dende'l día de la so nacencia", máxime cuando nun tien votos abondo nel Senáu. "Eso sería una catástrofe", recalcó.
De la mesma, defendió otra vuelta la so ufierta a Ciudadanos y al PSOE, ofreciendo a los socialistes estender esi acuerdu a dellos conceyos y autonomíes, daqué que llanzaría un "mensaxe bien positivo".
"Nesi acuerdu nacional podríamos buscar tamién una formula d'entendimientu, que sería distinto en cada sitiu, nes distintes instituciones", esplicó, asegurando que'l PP valencianu fizo una ufierta "bien clara" al Gobiernu socialista que podría "treslladase" a otros llugares.
Al so xuiciu, la opinión del expresidente socialista Felipe González, apostando por un Gobiernu del PP en minoría, ye "razonable abondo", pero Rajoy cree que "cuanto más estrecha seya la unión ente los trés partíos" más estabilidá va haber y meyor va ser pa la economía, porque van tar bien claros los apoyos.
¿VICEPRESIDENCIA PA PEDRO SÁNCHEZ?
Les posibles fórmules, dixo, son un gobiernu de coalición, un apoyu dende fuera o una "oposición constructiva". Preguntáu entós si taría dispuestu a ofrecer a Sánchez la vicepresidencia del Gobiernu, pidió "nun entrar n'agora nestes coses, anque almitió que tendría qu'escuchalu".
Con too, recordó que'l líder de Podemos, Pablo Iglesias, pidió ser vicepresidente de Sánchez y aseguró que'l líder socialista nun quier nin falar con él.
Ello ye qu'aseguró qu'intentó ponese en contactu con Sánchez una segunda vez dempués de les elecciones, pero qu'ésti nun quiso reunise con él.
Ye más, relató que con Iglesias y col líder de Ciudadanos, Albert Rivera, tuvo conversaciones "normales", d'una hora y media, cuando los recibió en Moncloa tres los comicios, mientres que la so xunta con Sánchez duró "cinco minutos" porque ésti llendóse a dici-y que "nun quería saber nada del PP".
