"Increíble pero cierto". Una frase que non por masuñada dexa de ser la que meyor recueye la esencia de la historia que relata 'La gran apuesta', la película que llega esti vienres a los cines españoles y que narra cómo unos tipos bien llistos supieron ver más allá de les mentires de los bancos, los medios y los gobiernos y aprovecharon los furacos del sistema y el viniente españíu de la burbuya inmobiliaria, que dempués daría llugar a una crisis económica a nivel global, p'amasar auténtiques fortunes.
Naide podía creer que too diba cayer embaxo, que'l sistema diba colapsar, naide sacante ellos, que sí lo vieron venir... y aprovechar. Los bancos esplumaron a los ciudadanos, y ellos tomaron la revancha de la meyor forma posible, esperando a dalgunos de los responsables d'esti sistema corruptu y desatapando la gran mentira del capitalismu. Una cruzada que, de primeres, pue sonar más a ficción, a fantasía revolucionaria, pero que ye una historia real.
Una historia que Michael Lewis (The Blind Side, Moneyball) recoyó nel so exitosu llibru y qu'agora Adam McKay ('El reportero', 'Hermanos por pelotas') lleva a la gran pantalla con un repartu de luxu encabezáu por Christian Bale, Steve Carell, Ryan Gosling y Brad Pitt y poniendo unes bones dosis d'humor negro y ritmu a esta rocambolesca y necesaria historia sobre'l mundu de los turbios trapicheos financieros de Wall Street.
Una visión gamberra, irreverente y fresca d'una historia tan real qu'a día de güei tovía sufrimos les consecuencies d'esi colapsu financieru global. Amás de ser didáctica y endiabladamente entretenida, McKay tamién espera que valga pa mover y remover al espectador, pa qu'ésti pase a l'acción y lo que vivimos fai tan solo unos años nun se vuelva repitir.
DAQUÉ MÁS QU'UNA PELÍCULA
"Esta película esplora como toa una cultura pue vese atrapada na obsesión d'un sistema corruptu. Nel mio caricaturescu suañu fantásticu, espero qu'esta película consiga disgustar y rabiar a la xente", afirma'l director, qu'espera qu'al salir del cine la xente tenga ganes d'alcontrase con un políticu pa preguntar qué fizo pa reformar el sistema bancariu y evitar qu'esto vuelva asoceder.
"Ési sería'l mio suañu, que tol mundu dixéra-y a lo políticos: 'Si nun tas a favor de desmangar los grandes bancos, nun m'importa que seyan d'izquierdes o de dereches, nun vas tener el mio votu'", sentencia'l director que la so deconstrucción de la gran mentira del capitalismu polo xeneral -y del sistema bancariu en particular- valió-y yá a la cinta de McKay delles reconocencies a nivel internacional.
Foto: Paramount.
