La Fiscalía Anticorrupción recurrió la sentencia de l'Audiencia Nacional qu'absolvió al cantante José Ramón Márquez, conocíu como 'Ramoncín', y a otros trés excargos de la Sociedá Xeneral d'Autores y Editores (SGAE) que taben acusaos de sustrayer 57.402 euros a la entidá ente setiembre del 2008 y marzu del 2011, según informaron a Europa Press fontes fiscales.
El Ministeriu Públicu presentó'l recursu por infracción de llei contra la resolución dictada'l pasáu 12 de xineru pola Estaya Segunda de la Sala de lo Penal, que consideraba que la salida de fondos de la entidá a favor del músicu obedeció a proyectos que yeren "reales" y non "hipotéticos", como caltenía l'acusación.
La SGAE nun se personó nesti procedimientu como acusación particular al considerar que "nun existió nenguna illegalidá na contratación de servicios polos que se remuneró" a 'Ramoncín' cuando yera sociu de la entidá.
La Estaya Segunda de la Sala de lo Penal absolvió va unos díes al músicu y al ex director xeneral de la Sociedá Dixital d'Autores (SDAE) José Luis Rodríguez Neri de los delitos de falsedá documental y apropiación indebida, polos que la Fiscalía pidía dos penes de cuatro años y diez meses de cárcel.
El tribunal tamién acabó esculpando al exdirector de los Servicios Xurídicos de la SGAE Pablo Hernández Arroyo, pal que l'Anticorrupción pidía dos años y nueve meses de prisión por apropiación indebida; y al ex director xeneral de SGAE y Exconsyeru de la filial dixital Enrique Loras, que s'enfrentaba a dos años de cárcel por esti mesmu delitu.
