Nun informe, Naciones Uníes indicó que 18.802 civiles morrieron y otros 36.245 resultaron firíos de resultes de la violencia n'Iraq ente xineru del 2015 y el 31 d'ochobre del 2015, mientres que 2,3 millones de persones viéronse desplazaes.

   L'informe, ellaboráu pola Misión d'Asistencia de la ONU pa Iraq (Unami) y la Oficina del Altu Comisionáu de la ONU pa los Derechos Humanos, ta basáu nos testimonios de víctimes, sobrevivientes o testigos de violaciones de los Derechos Humanos nel país.

   Según el documentu, el grupu terrorista cometió abusos xeneralizaos que "en dellos casos podríen equivalir a crimes de guerra, crimes contra la humanidá y posiblemente xenocidiu".

   Amás, estímase qu'unes 3.500 persones "tán reteníes nesti momentu como esclavos por Estáu Islámicu". "Los reteníos son predominantemente muyeres y neños y proceden principalmente de la comunidá yazidí, pero dalgunos tamién son d'otres comunidaes y minoríes étniques y relixoses", según el documentu, presentáu en Xinebra.

   Coles mesmes, el testu detalla execuciones por disparu, decapitación, con escavadores, de persones quemaes vives y llanzaes dende lo alto d'edificios. Amás, Naciones Uníes diz tener información sobre l'asesinatu de neños soldaos que trataben d'escapar y verificó informaciones que planteguen qu'a ente 800 y 900 neños en Mosul secuestráronlos pa recibir entrenamientu militar y relixosu.

   "Inclusive les obscenes cifres de víctimes nun llogren reflexar de forma precisa lo terriblemente que tán sufriendo los civiles n'Iraq", llamentó l'Altu Comisionáu de la ONU pa los Derechos Humanos, Zeid Raaad al Hussein, nun comunicáu.

   "Les cifres inclúin a aquéllos asesinaos o amputaos pola violencia abierta, pero incontables más morrieron pola falta d'accesu a alimentos básicos, agües o atención sanitario", sorrayó, destacando que l'informe "ilustra l'horror" del que los refuxaos iraquinos tán tratando d'escapar cuando fuxen hacia Europa y otres rexones.

ABUSOS D'OTROS GRUPOS

   Per otra parte, l'informe tamién documenta presuntes violaciones y abusos de los Derechos Humanos per parte de les fuerces de seguridá iraquines y les fuerces que los apoyen, incluyíes les milicies y les fuerces tribales, asina como los peshmergues curdos.

   La ONU tien informaciones sobre asesinatos illegales y secuestros por estes fuerces, dalgunos d'ellos como presunta "represalia contra persones percibíes como qu'apoyen o tán vinculaes con Estáu Islámicu".