A un paramédicu nazi, de 95 años d'edá, que trabayó nel campu de concentración d'Auschwitz mientres la Segunda Guerra Mundial van xulgalu en febreru por un tribunal alemán por ser cómpliz nel asesinatu de polo menos 3.681 persones, ente les que taba Ana Frank, mundialmente conocida pol so diariu.
El xuiciu celebraráse'l 29 de febreru na población alemana de Nuevu Brandeburgu, dempués de que n'avientu un tribunal calificara al acusáu, Hubert Z., como aptu pa enfrentase al procesu xudicial. Sicasí, el tribunal esplicó que na primer sesión va determinase l'estáu de salú del imputáu, pues caltiénse en duda que puea soportar el viaxe y el xuiciu.
Otres dos vistes planiáronse pal mes de marzu y, una vez determinaes les condiciones baxo les que puen desarrollase los procedimientos, van convocase nueves feches pa siguir col xuiciu.
ANA FRANK VIAXABA NÚN DE LOS TRENES
Hurbert Z. trabayó como sarxentu de les SS nazis n'Auschwitz ente ochobre de 1943 y xineru de 1944, y como paramédicu del recintu dende'l 15 d'agostu hasta'l 14 de setiembre de 1944.
Mientres esi mes, polo menos 14 trenes de deportación llegaron al campu d'esterminiu dende Lyon, Viena o Westerbork (Países Baxos). Ente los sos cientos de pasaxeros alcontrábense Ana Frank y la so familia. Munchos d'ellos, incluyida la moza adolescente xudía, acabaron finando nes cámares de gas del recintu.
Magar que l'antiguu paramédicu nun ta acusáu de participar directamente en nengún de los crimes, la Fiscalía considera qu'Hubert Z. yera consciente de les actividaes d'esterminiu que se desarrollaben n'Auschwitz. Amás, por xunise a la so estructura organizativa --les SS-- participó conscientemente ya inclusive aceleró les execuciones de miles de persones.
