La presidenta de la Xunta d'Andalucía y secretaria xeneral del PSOE-A, Susana Díaz, quiso dexar claro esti llunes que'l PSOE, en casu de que tuviera qu'asumir la responsabilidá de conformar gobiernu nesti país, tien qu'esixir que les formaciones que se sienten a la mesa de negociación nun pongan enriba d'ella nin el derechu a l'autodeterminación nin el derechu a decidir de Cataluña si sigue nel proyectu común que ye España, en referencia a Podemos.
Asina se pronunció Susana Díaz mientres la so intervención ante la Interparlamentaria del PSOE-A, onde indicó que nel Comité Federal celebráu tres les elecciones xenerales, "marcóse una fueya de ruta clara y nítida", que supón un non "atayante" del PSOE a la investidura de Mariano Rajoy como presidente del Gobiernu y esixir a que los que se sienten a negociar que nun pongan sobre la mesa'l derechu a l'autodeterminación de Cataluña, n'alusión a Podemos.
Díaz, qu'aludió a la gran responsabilidá que tienen los diputaos y senadores andaluces nestos momentos difíciles pal país y a qu'Andalucía ye un factor d'estabilidá y de cohesión social y territorial, alertó que dalgunos pretenden llevar al PSOE "a una trampa histórica" ente los que dicen defender la Constitución y los que teóricamente falen de pactos sociales, cuando lo único que-yos importa ye llevantar muries ente families, pueblos y territorios n'España.
En referencia a Podemos, señaló que-y cuesta trabayu pensar qu'haya fuerces d'izquierdes qu'en cuenta de poner per delantre les necesidaes de la xente, antepongan les fronteres y los muries ente unos y otros.
