El grupu terrorista Estáu Islámicu arrampuñó terrenu a les fuerces gubernamentales siries cerca de la ciudá de Deir al Zor, nel este del país, esti llunes, según informó l'Observatoriu Siriu pa los Derechos Humanos, nel tercer día d'asaltu nel que según los medios estatales morrieron 300 persones.
Según l'Observatoriu, tovía nun se tienen noticies de les 400 persones presuntamente secuestraes, según s'informó cuando Estáu Islámicu empezó'l so ataque contra les zones controlaes pol Gobiernu siriu na ciudá'l sábadu. Los medios estatales nun ficieron nenguna mención al secuestru.
Deir al Zor ye la principal ciudá na provincia del mesmu nome. La provincia une la capital de facto del autoproclamáu califatu d'Estáu Islámicu, Raqqa, col territoriu controláu pola organización terrorista nel vecín Iraq.
Estáu Islámicu, que controla bona parte de la provincia, atacó dende marzu les zones que tovía siguen baxo control del Gobiernu siriu na ciudá de Deir al Zor.
Esti llunes foi'l tercer día d'ataques d'Estáu Islámicu nes poblaciones d'Ayyash y Begayliya, que s'alcuentren al noroeste de la ciudá de Deir al Zor entrando dende Raqqa. El grupu terrorista fízose col control de zones nel sur y l'oeste de Begayliya y apoderóse de la base militar de Saeqa, cerca d'Ayyash, según l'Observatoriu.
Una fonte oficial siria señaló a Reuters que l'Exércitu siriu tornó l'ataque, pero Estáu Islámicu sigue la so ofensiva.
Sicasí, el grupu terrorista publicó un comunicáu nos últimos minutos anunciando la toma completa de la base. Nel testu publicáu nes redes sociales, aseguraron que se ficieron con "los depósitos d'armes y un tanque".
