Nuna entrevista de TV3 recoyida por Europa Press, esplicó que'l so oxetivu ye empezar a redactar una constitución catalana y, al traviés d'un referendu posterior, buscar asina que "una mayoría" de catalanes avalen el nuevu Estáu catalán.

   El plan del nuevu presidente ye "enanchar" la base del soberanismu  fomentando la participación ciudadana na redacción d'esta norma, dempués celebrar un referendu y a lo último unes elecciones constituyentes tres les que, entós sí, declararíase la independencia de Cataluña.

   Preguntáu por si aspira a ser el presidente d'una eventual república catalana, espunxo: "fairíanos ilusión a toos pero nun ye lo que plantego", aseguró, insistiendo en qu'asume'l cargu consciente de que ye daqué temporal y coles mires de promover el procesu soberanista, non de ser protagonista.

SIN LLAMAES

   Puigdemont aseguró que'l xuramentu que fizo al prometer el cargu foi "llegal dafechu" magar nun citar nin al rei nin a la Constitución, y llamentó que'l presidente del Gobiernu en funciones, Mariano Rajoy, nun lu llamara pa felicitalu pol cargu.

   "Tendría que ser una norma básica de cortesía del presidente del Gobiernu, anque tea en funciones. Nun tuviera de más llamar al presidente de la Generalitat si cree que soi'l representante ordinariu del Estáu" en Cataluña, cavilgó, y tamién criticó que'l rei nun recibiera a la presidenta del Parlament, Carme Forcadell.

   Por llei, Puigdemont ye'l represente del Estáu na comunidá catalana  por cuenta del so cargu de presidente del Govern, pero afirmó que nun se siente como represente del Estáu y el motivu ye "cómo se trata a los representantes de Cataluña" dende'l Gobiernu central.

   Aseguró que, magar defender un proyectu políticu como la independencia que ye absolutamente contrariu a los intereses del Estáu, nun tien nenguna intención de romper pontes, pero avisó que l'oxetivu ye consiguir un Estáu catalán: "nun vamos engurriar".

PRESUPUESTU

   Puigdemont aseguró que la so intención ye aprobar los Presupuestos del 2016 nos próximos meses --nesti momentu tán prorrogaos los del 2015--, deseó que la CUP s'abra a apoyalos, pero añadió que tampoco sería "nada tarrecible" tener que tar tol añu cola prórroga vixente.

   "Nun lo tenemos al cien por cien garantizao", reconoció sobre les posibilidaes d'aprobar les cuentes, y aseguró que prevé meyorar los ingresos al traviés de "negociar meyor la deuda" y les liquidaciones del Estáu, unos ingresos que tienen que permitir encarar una parte del plan de choque social.

Foto: CCMA.