AQMI inclúi nel so videu'l discursu d'un dirixente del grupu terrorista llamáu Abu Obeida Youcef Annabi. Les sos palabres siéntense mientres s'aprecia una semeya suya y el logotipu de 'Al Andalus', nome de la productora que davezu realiza los conteníos audiovisuales d'AQMI.

   Esti vídeu detectólu AICS, empresa dedicada al analís de l'amenaza yihadista, que nel so informe al que tuvo accesu Europa Press afirma que l'oxetivu de los terroristes ye facer "un llamáu a los sentimientos más fondos de los musulmanes, al mentar Ceuta y Melilla, llamando a retomar dambes ciudaes".

   De 23 minutos de duración, el videu ta especialmente dirixíu a la población de Libia a la qu'encamienta "refugar l'establecimientu d'una pseudo-democracia y negar la definición de terrorismu, no que cinca a les actividaes de los grupos islamistes".

OTRES AMENACES

   Culpa a los países qu'al so xuiciu tán baxo la influencia d'Europa y los Estaos Uníos y pide a "los mozos musulmanes de Libia que reaccionen contra la llamada invasión que los italianos tán llevando a cabu nel país y unise a la yihad" de la que fai un llamáu xeneral "pa llevar a cabu ataques en Reinu Uníu, EE.UU ya Italia y los países europeos".

   Yá'l pasáu 7 de xineru AICS detectó otru videu editáu pola productora 'Al Andalus' d'Al Qaeda nel Magreb Islámicu (AQMI) na que se mostraba a un yihadista amenazando con realizar atentaos en ciudaes como "Nápoles, Roma y Madrid".

   El videu enseñaba imaxes d'acciones terroristes y a los integrantes d'un grupu (Khatiba) qu'actúa en Mali con un español de Melilla nes sos files llamáu Abu al-Nur al-Andalusi. Esti terrorista yá pidió en setiembre n'otru videu que "los hermanos musulmanes n'España" fueren facer la yihad.