La Organización Mundial de la Salú (OMS) dio por acabáu l'últimu biltu d'ébola declaráu en Liberia y con ello dio por rematada la epidemia rexistrada nesti país y en Guinea y Sierra Lleona mientres los dos últimos años, magar alvirtió que debe caltenese la vixilancia ante posible casos esporádicos.
"Toles cadenes conocíes de tresmisión contuviéronse n'África Occidental", resaltó la OMS, alvirtiendo que "el trabayu nun acabó, espérase qu'haya nuevos biltos" y por ello ye "crítico caltener sistemes de vixilancia y respuesta fuertes nos próximos meses.
Liberia yá taba declarada llibre d'ébola en mayu del 2015, pero'l virus volvió apaecer dos veces nel país, la última d'elles en payares. Esti xueves cumpliéronse los 42 díes del periodu d'incubación dende que l'últimu paciente confirmáu diera negativu.
El representante de la OMS en Liberia, Alez Gasasira, emponderó "la efectiva respuesta a esti últimu biltu d'ébola", lo mesmo del Gobiernu como de los liberianos y consideró que'l rápidu control del nuevu biltu demuestra que les autoridaes cuenten agora con "una capacidá reforzada" pa enfrentar el virus.
CERO CASOS NOS TRÉS PAÍSES
Coles mesmes, la OMS resaltó que la primer ved dende que la epidemia empezó va dos años "los trés países más afectaos rexistraron cero casos mientres polo menos 42 díes". Sierra Leona declaróse llibre d'ébola'l 7 de payares y Guinea el 29 d'avientu.
Pela so parte, la directora xeneral de la OMS, Margaret Chan, tamién resaltó los esfuerzos realizaos pa poner fin a la epidemia y alvirtió que "el nuesu trabayu nun ta acabáu y fai falta caltener la vixilancia pa evitar nuevos biltos".
