El diputáu del PSOE por Vizcaya y exlehendakari Patxi López salió escoyíu esti miércoles presidente del Congresu de la XI Llexislatura na segunda votación colos únicos votos de PSOE y Ciudadanos. Ye la primer vez nesta etapa democrática que la tercer autoridá del Estáu nun pertenez al partíu mayoritariu nel hemiciclu.
Al nun superar el mínimu de 176 diputaos y nun llegar a la mayoría absoluta que-y daría la Presidencia nuna primer votación, el candidatu socialista tuvo que midise nuna segunda vuelta con Carolina Bescansa, l'aspirante propuesta por Podemos.
En dambes votaciones el resultáu foi'l mesmu: 130 votos pa López (89 del PSOE, unu de Nueva Canarias y 40 de Ciudadanos) y 71 pa Bescansa, los que sumen los 69 diputaos de Podemos y les sos marques territoriales y los dos d'IU-Unidá Popular.
Rexistráronse 148 votos en blancu, del PP y los partíos minoritarios y unu nulu porque daquién punxera na papeleta 'el neñu de Bescansa'.
