El preciu del llitru de gasóil cayó la primer vez nos últimos seis años perbaxo del euru, asitiándose en mínimos d'últimos del 2009, dempués de rexistrar un descensu del 4,27%, en comparanza con últimos del 2015, según datos del Boletín Petroleru de la Unión Europea (UE) recoyíos por Europa Press.
En concreto, el llitru de gasóil quedó nuna media de 0,962 euros, lo que supón el nivel más baxu dende l'últimu trimestre del 2009.
Esti carburante, consumíu por cerca del 70% del parque automovilísticu español, cuesta nesti momentu un 12,7% menos qu'a primeros del añu pasáu.
Tocantes a la gasolina, el so preciu queda nuna media de 1,13 euros, un 0,7% menos que l'últimu datu d'últimos del 2015 del Boletín Petroleru de la UE. D'esta manera, avérase a los mínimos del añu pasáu. Esta cayida en dambos carburantes coincide colos mínimos marcaos nos precios del crudu. El preciu del barril de petróleu Brent asitiábase esta mañana perbaxo de los 33 dólares, ante l'empeoramientu de les perspectives de crecimientu mundial y la rocea pola situación en China, el so nivel más baxu dende abril del 2004.
ENLLENAR EL DEPÓSITU, CASI 8 EUROS MENOS.
D'esta manera, l'enllenáu d'un depósitu mediu de gasolina de 55 llitros cuesta nesti momentu 52,91 euros, abaratándose en casi ocho euro con al respective de primeros del añu pasáu. Nel casu de la gasolina, enllenar el depósitu del vehículu supón un desembolsu de 62,2 euros, un euru menos qu'a primeros del 2015.
A pesar d'estos precios medios, esti añu ye posible alcontrar nos surtidores de la Península Ibérica, lo mesmo la gasolina como'l gasóil bien perbaxo d'estos precios.
