Madrid (E.P.).-Seúl y Pyongyang embarcáronse esti vienres nuna guerra de propaganda na so frontera col fin de desacreditar al contrariu dos díes depués de que Corea del Norte sorprendiera al mundu col anunciu de qu'españara con éxitu una bomba d'hidróxenu.
En respuesta a esti fechu, el Gobiernu surcoreanu decidió retomar de magar esti vienres la emisión de propaganda antinorcoreana per mediu d'altavoces instalaos na frontera. La continuación de la propaganda produzse precisamente'l día en que se cree que'l líder norcoreanu, Kim Jong Un, cumple los años, unos 30, anque la so edá exacta ye tou un misteriu.
L'Exércitu surcoreanu llevara a cabu mientres delles selmanes del añu pasáu una campaña psicolóxica per mediu d'altavoces como represalia pola esplosión de mines terrestres norcoreanes que provocaron firíes a dos soldaos surcoreanos. La midida fadió a Pyongyang, que llegó a amenazar con atacar al so vecín.
A lo último, la emisión quedó suspendida pol acuerdu algamáu ente los dos países, técnicamente tovía en guerra más de 60 años dempués del fin de la Guerra de Corea, algamáu'l pasáu 25 d'agostu col fin de suavizar les tensiones na península.
Según Yonhap, les emisiones entamaron esti vienres n'once puntos a lo llargo de la frontera con dures crítiques contra'l réxime de Kim y los sos crimes de lesa humanidá, amás de mensaxes sobre los llogros surcoreanos ya inclusive cantares de K-pop, un estilu de música surcoreanu.
Les emisiones tienen un algame superior a 10 kilómetros de distancia mientres el día y unos 24 kilómetros de distancia mientres la nueche. "Les ropes de Kim Jong Un y Ri Sol Ju cuesten decenes de miles de dólares caúna y el so bolsu val miles de dólares tamién", foi unu de los mensaxes emitíos, según Reuters.
PYONGYANG RETOMA LA PROPAGANDA TAMIÉN
Ante esta circunstancia, Pyongyang optó por volver a entamar igualmente la so propaganda contra'l so vecín del sur, según informó un funcionariu del Ministeriu de Defensa surcoreanu a Yonhap.
"Delles unidaes militares de Corea del Norte esplegaes na frontera intercoreana empezaron la tresmisión de propaganda antisurcoreana pa que los sos ciudadanos nun puean escuchar la propaganda contra'l so réxime", indicó.
