Un videu acabante d'editar la productora 'Al Andalus' d'Al Qaeda nel Magreb Islámicu (AQMI) muestra a un yihadista amenazando con realizar atentaos en ciudaes como "Nápoles, Roma y Madrid". El videu amuesa imaxes d'acciones terroristes y a los integrantes d'un grupu (Khatiba) qu'actúa en Mali con un español de Melilla nes so files llamáu Abu al-Nur al-Andalusi. Esti terrorista yá pidió en setiembre n'otru videu que "los hermanos musulmanes n'España" fueren facer la yihad.
"Güei ellos tán na nuesa tierra, na tierra del Islam, pero col permisu de Dios va llegar un día en que nós vamos consiguir pega-yos nes sos tierres, en Nápoles, en Roma, en Madrid, esplosiones perdayuri col permisu de Dios". Asina s'espresa n'árabe unu de los yihadistes nesti videu de 13 minutos de duración recoyíu por Europa Press al que tuvo accesu AICS, empresa dedicada al analís d'amenaces terroristes nel esterior.
En concreto esti individuu apaez nel segundu minutu del videu nel que s'asoceden otros testimonios, asina como imaxes d'atentaos en zones desérticas. El yihadista español Abu al-Nur al-Andalusi apaez en delles ocasiones según los espertos que yá analizaron les imaxes, anque de forma especialmente nidia nel minutu 2.45, onde se-y ve en primer planu con unes gafes de sol marca Ray Ban y una gorra de visera negra. El videu yá obra en poder de les fuerces de seguridá españoles y analizóse.
El pasáu mes de setiembre los yihadistes emitieron otru videu de 18 minutos nel que se mostraba un atentáu de la Khatiba al-Quds contra un convói de la ONU en Mali. Nesti videu figuraba'l terrorista de Melilla falando n'español: "Mensaxe a los nuesos hermanos musulmanes n'España y n'especial en Melilla: que se muevan y que se dirixan hacia cualquier sitiu nel qu'haya yihad. Precisamos que los nuesos hermanos musulmanes mos ayuden y vengan combatir, que garren les sos armes y que se dexen de la compañía de les sos muyeres y los sos fíos".
Foto: AICS.
