La normalización del idioma ye ún de los puntos d’alcuerdu de los grupos de gobiernu SOMOS Uviéu, PSOE y IU. Los tres grupos, cada ún a la so manera, tien voluntá de llevar alantre midíes de normalización del idioma nel Conceyu d’Uviéu, importa trabayar entós en consensuar cómo lo vamos a facer.

Dende SOMOS Uviéu "tenémoslo claro, queremos un Serviciu de Normalización Llingüística (SNL) como ferramienta de trabayu. Un serviciu que debe tar atendíu por persones capacitaes llingüística y técnicamente nunes condiciones de trabayu iguales al restu de servicios pa lo qu’esperamos poder sacar una o más places públiques (responsable del serviciu y personal auxiliar) cuanto primero. Nesta llínia, SOMOS Uviéu llevamos la iniciativa y presentamos un presupuestu pa un serviciu con capacidá de tresversalidá dientru de la estructura municipal y proponemos asitialo na Conceyalía d’Información y Participación por ser la so propia naturaleza tresversal y por tar representada pola vicealcaldesa d’Uviéu.

Ha ser una ferramienta de planificación, xestión y asesoramiento, ha sirvir, pensamos, non sólo pa que se fale de lo asturiano n’asturianu sinon tamién de
dinamización de campañes en toles árees de gobiernu. Nesti sentíu, toles árees van poder contribuyir a la normalización nel Conceyu d’Uviéu. Árees como Cultura,
Educación y Deportes tienen un gran potencial pero ensin desmerecer otres como Seguridá Ciudadana, Personal, Economía (turismo y comerciu), Urbanismu o Atención a les Persones que van tener oportunidá de desenvolver campañes mandándose tamién del asturianu. Tamién va ser la estructura sobre la que se desendolque un Plan de Normalización Llingüística acordies al Conceyu d’Uviéu.

Apostamos entós por un SNL de calter tresversal qu’ufierte un serviciu lo más ampliu posible de dinamizador de les polítiques municipales mandándose del asturianu y añadiendo un plus a la marca municipal al traviés del respetu a los derechos llingüísticos de los asturianos y asturianes y del apueste pol patrimoniu llingüísticu y cultural nun sentíu ampliu.