“Perriba de too, Andrés Solar foi una presona comprometía nacional y socialmente col so Pueblu”.

La intervención de Carme Pérez nel actu d’homenaxe al hestóricu militante nacionaliegu destacó perriba de too, el so fondu compromisu nacional y social, reivindicándolu comu nacionaliegu d'izquierda, daqué que suel tapecese destacando namás el so perimportante llegáu lliterariu.

Na so categoría de collacia-militante d’Andrés Solar nel aniciu del Ensame Nacionalista Astur, organización precursora d’Andecha Astur, Carme Pérez destacó la so nobleza de carauter y l’enfotu n’Asturies y nel Pueblu Asturianu, dende la humildá que lu carauterizaba y la empatía y la sensibilidá que tan bien espeyó na so obra lliteraria.

L’actu, que tevo llugar a la puerte del cementeriu Deva, onde Andecha Astur tien llantada un placa na so alcordanza, cuntó cola intervención tamién de Lali Solar, hermana d’Andrés, qu’agradeció l’alcordanza de la que ye oxetu’l so hermanu 31 años dempués de la so muerte, y qu’espiricó anéudotes de la so vida y el so calter, enfrescando la memoria a los que lu conocieren y faciéndolu más prósimu pa quien nun tuviere esi privilexu.

Un ramín de flores al llau de la placa dexó costancia un añu más de que nun s’escaez el so llabor, y que güei, 31 años dempués de la so muerte, sigue siendo un exemplu a siguir pal nacionalismu d’izquierda asturianu.