El secretariu d'Organización del PSOE, César Luena, adelantó esti llunes que los diputaos socialistes van refugar la investidura del 'popular' Mariano Rajoy como presidente del Gobiernu porque los sos 5,5 millones de votantes "votaron pa cambiu a Rajoy".
Asina lo avanzó en declaraciones a Acopar y a Ser, recoyíes por Europa Press. Preguntáu pola posibilidá d'una 'gran coalición' de socialistes y 'populares', respondió que "los españoles votaron cambiu" y el PP perdió más de cuatro millones de votos, asina que "tán pidiendo un cambiu de polítiques, non lo contrario" y "un Parlamentu con minoríes fuertes" que van tener que negociar.
Luena repitió que'l so partíu va ser "prudente y responsable", y eso supón respetar el mandatu de los españoles, asina que correspuende al PP intentar formar Gobiernu y ye pronto pa falar de nada que nun seya esperar a ver "qué pue faer el PP".
Por eso, evitó valorar les condiciones pa un pactu fixaes el domingu de nueche pol líder de Podemos, Pablo Iglesias. Según dixo, eses condiciones --reforma constitucional pa blindar los derechos sociales, reforma electoral y posibilidá de revocación del Gobiernu polos ciudadanos-- nun lu dexen "nin más y nin menos tranquilu sele".
EL PSOE CALTIEN LA HEXEMONÍA DE LA IZQUIERDA
Lo que sí lu tranquiliza, dixo, ye que los 5,5 millones de votos que recibió'l PSOE dexaron claro que'l PSOE ye'l partíu hexemónicu y mayoritariu de la izquierda y "l'alternativa al PP ye'l PSOE", anque almitió que'l PSOE tendrá de cavilgar. Por eso, calificó de "aceptable" el resultáu del PSOE'l 20A, porque considera que "aguantó" mientres el PP "sufrió un fundimientu".
Sicasí, sí dexó claro que, "al marxe de cualquier resultáu electoral", pal PSOE ye "indiscutible" l'artículu 2 de la Constitución, el que diz que la soberanía nacional reside nel pueblu español.
Luena recordó que'l PSOE defende una reforma constitucional pa que los catalanes y tolos españoles puean votar, pero dientro del calce de la Constitución. Iglesias nun mentó'l llamáu "derechu a decidir" de Cataluña y la celebración d'un referendu ente les sos condiciones pa negociar, anque sí lo ye pa En Comú Podem, qu'aporta 12 de los 69 diputaos de Podemos.
El 'númberu dos' del PSOE sí almitió qu'en Madrid llogró un "mal resultáu", dao que los socialistes fueron cuarta fuerza política y quedaron con seis escaños, y atribuíse a que nun avagó desarrollar abondo los cambios que s'impulsaron na federación madrilana. "Tenemos qu'entainalos y consolidalos", resumió.
