Denguna de les candidatures presentaes respuende a los intereses d’Asturies; a la escontra, suponen un pasu atrás a la hora d’avanzar nun procesu costituyente propiu.

Andecha Astur llama a los asturianos con drechu a votu n’otres naciones del Estáu español a sofitar col so votu a les candidatures soberanistes apautaes al sopelexu “Los Pueblos Tenemos la Pallabra”. 

Nestes elleiciones al Congresu y Senáu españoles, nes que n’Asturies namás participen franquicies  de formaciones polítiques españoles, Andecha Astur considera que pesia la esistencia d’importantes coincidencies nel tarrén social con alguna d’elles, el so plantegamientu sucursalista p’Asturies y la defensa del actual marcu xurídicu-políticu español con diferiencies pocu más que de matiz impide que los asturianos y asturianes podamos sentimos representaos per denguna d’elles. Votales supondríe votar tamién el calter sucursal del nuesu país y la defensa del actual modelu d’Estáu español, responsable del esfarrapamientu nacional y social del Pueblu Asturianu.

Per otru llau, y anque nun ye la primer vegada qu’Andecha Astur decide nun presentase a unes elleiciones estatales, nesta ocasión el plantegamientu que mos lleva a ello ye la priorización de los esfuercios en reforciar la dinámica política asturiana, vista la necesidá de xuncir fuercies nuna alternativa d’izquierda nacionaliega con capacidá p’avanzar nun procesu costituyente propiu, atalantando que tenemos d’afondar na reflexón y planificación, comu se fexo nel pasáu Conceyu Nacional.

Per otru llau, Andecha Astur llama a los asturianos que por una xida o otra agora mesmo s’afayen n’otres naciones o comunidaes onde se presenten candidatures soberanistes apautaes al sopelexu “Los Pueblos Tenemos la Pallabra”, a que les sofiten activamente, mesmamente col so votu, nel comencimientu que’l so trunfu sedrá’l nuesu y que respetando la especificidá de ca procesu, comparten con nós un proyeutu soberanista común.