L'alianza antiterrorista islámica anunciada por Arabia Saudina va compartir información y va entrenar, va fornir y va suministrar fuerces si ye necesario pa la llucha contra Estáu Islámicu, esplicó esti martes en París el ministru d'Esteriores saudín, Adel al Jubeir.
Arabia Saudina anunció a primer hora del martes la formación d'una coalición militar islámica integrada por 34 países pa combatir el terrorismu, un xestu que recibió bona acoyida per parte d'Estaos Uníos.
"Nada ta fuera de la mesa", señaló Al Jubeir a preguntes sobre si la iniciativa podría incluyir l'espliegue de tropes sobre'l terrenu.
"Depende de los pidimientos que se reciban, depende de la necesidá y depende de la voluntá de los países d'emprestar l'apoyu necesariu", añadió.
Pela so parte, el secretariu de Defensa estaounidense, Ashton Carter, consideró que la formación d'esta alianza ta en llinia colos llamaos per parte d'Estaos Uníos a una mayor implicación per parte de los países suninos na llucha contra organizaciones terroristes como Estáu Islámicu.
"Tamos deseando saber más sobre lo qu'Arabia Saudina tien en mente en términos d'esta coalición", comentó Carter a la prensa n'Incirlik, Turquía.
"Pero polo xeneral paez que ta bien en llinia con daqué que tuvimos reclamando dende va bien de tiempu, que ye una mayor implicación na campaña pa combatir a Estáu Islámicu per parte de los países suninos", añadió.
