Lo mesmo Iruretagoyena, consideráu'l máximu espertu n'esplosivos de la banda terrorista cuando lu detuvieron en Cahors (Francia) en septiembre del 2007, como los otros trés acusaos --Pedro María Olano, Gregorio Jiménez Morales y Juan María Mujika Dorronsoro-- negáronse a contestar a les preguntes del teniente fiscal, Jesús Alonso, y respondieron namás a les sos defenses.

   "Yo nun tengo nada que falar col señor fiscal", dixo Iruretagoyena Lanz, que reconoció la so militancia n'ETA dende l'añu 1974 anque añadió que nun conocía a los otros acusaos nin desarrolló nunca nenguna actividá xunto con ellos na organización terrorista.

   Tamién aseguró que difícilmente pudo participar nel tresporte d'un llanzamisiles o de cualquier tipu d'esplosivos porque perdió la manzorga en 1983. "Estráñame muncho porque nun pueo manexar nin una escopeta de caza", dixo.

PENES DE 71 Y 72 AÑOS

   Al cabu del xuiciu, que quedó vistu pa sentencia, el representante del Ministeriu Públicu elevó a definitivu'l so pidimientu de penes de 72 años pal etarra y de 71 pa los otros trés acusaos, a los que considera "coautores o cooperadores necesarios" del atentáu al llevar a cabu'l treslláu del material que pretendía utilizase pa baltar l'avión presidencial.

   Olano, pela so parte, dixo que nunca formó parte d'ETA y alegó que la declaración ante la Guardia Civil na que detalló'l plan de la banda terrorista realizóse "baxo tortures psicolóxiques y físiques". "Glayábenme, pegábenme na cabeza y obligábenme a facer flexones hasta que cayía nel suelu", aseguró.

   Gregorio Jiménez tamién negó les acusaciones del Ministeriu Fiscal ya indicó que "nunca" tuvo nenguna relación cola banda terrorista. Sobre la so estancia en Francia, dixo que se treslladó porque la empresa na que taba emplegáu "nun diba bien" y empezó a trabayar en "una empresa de tresporte de pescáu vivo".

   Múgica Dorronsoro tamién se desvinculó d'esti atentáu y aseguró que, como muncho, tuvo "cuatro veces en Tolosa (población na que s'alcontró'l zulu presuntamente utilizáu polos etarres), nel antroxu de la población, que ye bien famosu y "en dalgún día de mercáu". A preguntes sobre si dalguna vegada tuvo integráu n'ETA, formó parte de dalgún comandu' o fabricó zulos, dexó escapar delles rises iróniques. "¡Qué va, qué va!", contestó.

   Tamién negó que se refuxara en Francia pola so militancia n'ETA y dixo que se foi a vivir ellí nel 2007 porque tuvo "problemes familiares" cola so muyer y quería faer la so "vida". Según les sos esplicaciones, unióse a una cooperativa d'horticultura biolóxica y, utilizando'l so nome, alquiló una vivienda, abrió una cuenta bancaria y mercó una furgoneta col so correspondiente seguru. "Yo nun taba escondíu, taba trabayando", recalcó.

   De la mesma, refugó ser l'autor d'una nota manuscrita supuestamente dirixida a la so fía Irati, a la que llama 'Pitusa', na que-y confesaba la so integración nun 'talde' con una persona que tuvo "un problema" en Lizarra (Navarra). La Guardia Civil cree qu'hubo un error tipográficu ya identifica a esta persona con Pedro María Olano, condenáu a dos años de cárcel por amenazar a l'alcaldesa de Lizartza, Regina Otaola (PP). "Yo nun sé escribir a máquina nin utilizar l'ordenador y nunca llamé a la mio fía 'Pitusa'", alegó Mújika.

Foto: Pool.