PP, PSOE, Ciudadanos, IU y UPyD elixeron Madrid pa celebrar a les 00.00 hores d'esti vienres el tradicional actu de pegada de carteles, que da entamu a les dos selmanes de campaña electoral antes de los comicios del día 20. Namás Podemos elixó una ubicación distinta y optó pola población zamorana de Villaralbo pal so primer actu electoral.
PP
El presidente del Gobiernu, Mariano Rajoy, pidió l'apoyu pal so partíu nes elecciones xenerales del 20 d'avientu, asegurando que "el pasáu aválalu" y que "supieron gobernar". "El retu agora ye'l futuru", recalcó.
Asina pronuncióse Rajoy na pegada de carteles del PP que dio oficialmente'l pistoletazu de salida a la campaña electoral. Ante de la llegada del presidente, el partíu amenizó l'actu col Dj El Pulpo y instaló un puestu de churros con chocolate pa que los cargos del partíu y los simpatizantes soportaren meyor el fríu na cai Génova, onde ta la sede central del partíu.
PSOE
El candidatu del PSOE a la presidencia, Pedro Sánchez, pidió la primer vez el votu a los españoles pa "dar una llección de verdá al Gobiernu de la mentira", que manipuló y mintió con "too" mientres estos cuatro años y que "güei volvió a facelo" cola encuenta del CIS.
CIUDADANOS
Pela so parte, el presidente de Ciudadanos y candidatu a la presidencia del Gobiernu, Albert Rivera, afirmó que'l del so partíu ye "l'únicu proyectu que xenera ilusión", y mostróse convencíu de que "dará la sorpresa" el 20 d'avientu, faciéndose cola victoria nes elecciones xenerales.
PODEMOS
El candidatu de Podemos, Pablo Iglesias, llanzó esta nueche un mensaxe d'esperanza nel entamu de la campaña electoral nel qu'afirmó que "güel a remontada". Fízolo na población zamorana de Villaralbo, un pueblu de menos de 2.000 habitantes onde quiso dar el pistoletazu de salida a esta campaña electoral.
IU-UNIDAD POPULAR
El candidatu d'IU-Unidá Popular, Alberto Garzón, pidió'l votu pa promover un "cambiu real" n'España, frente a les propuestes de los demás candidatos, qu'avancen hacia "un centru superpobláu". Garzón reivindicóse como representante del 15M, col oxetivu de "caltener viva la llama de los derechos".
UPYD
UPyD entamó la so campaña electoral más difícil na que la formación maxenta llanzaráse a pol escañu y pidirá'l votu pa evitar la so desapaición del Congresu de los Diputaos, magar que les últimes encuestes, incluyida la del CIS, nun-y dan representación parlamentario.
