Nel so discursu del Estáu de la Nación ante'l Parlamentu, Putin dexó claro a Turquía qu'equivocóse "fondamente" si piensa que va "llibrase", en cometiendo "un infame crime de guerra" al valtar el so avión, provocando la muerte d'unu de los sos pilotos.

   "Recordarémos-yos más d'una vez lo que ficieron y van arrepentise más d'una vez de lo cometío", sorrayó Putin, según informen los medios rusos. "Sabemos qué hai que facer", añadió.

   Per otra parte, caltuvo que "cualquier país civilizáu tien que contribuyir a destruyir a los terroristes, reafirmar la so solidaridá, non con declaraciones sinón con acciones concretes".

   Esto significa, según el presidente rusu, que "nun tendría qu'haber doble raseru, nun tendría qu'haber contactos con nenguna organización terrorista, nin intentos d'usales pa los sos propios fines, nin nengún negociu criminal y sangrín colos terroristes".

   El mandatariu facía referencia asina a les denuncies formulaes esti miércoles por altos mandos de Defensa rusos, que dixeron que Turquía ye'l "principal comprador" del petroleu que saca de contrabandu'l grupu terrorista Estáu Islámicu de Siria ya Iraq y que'l presidente turcu, Recep Tayyip Erdogan, y la so familia tán implicaos nesti negociu.

   Coles mesmes, Putin alvirtió que "ye imposible ganar al terrorismu internacional namás colos esfuerzos d'un solu país", especialmente, añadió, "en condiciones nes que les fronteres del mundu tán prácticamente abiertes y el mundu ta travesando un nuevu reasentamientu de persones", n'alusión a la crisis de refuxaos qu'afecten a Europa.