El Tribunal Supremu d'Apelación de Suráfrica elevó de "homicidiu" a "asesinatu" el cargu pol que condena al atleta Oscar Pistorius, sentenciáu nuna instancia inferior a cinco años de cárcel pola muerte de la so moza, Reeva Steenkamp.
Pistorius disparó en cuatro ocasiones contra Steenkamp en febreru del 2013, según la so defensa, en confundiéndola con un intrusu. El tirotéu tuvo llugar con una puerta de bañu pel mediu, lo que supuestamente-y torgaba ver quién taba del otru llau.
Al atleta condenáronlu de primeres por un delitu d'homicidiu y el 19 d'ochobre pudo abandonar la cárcel y quedar baxo arrestu domiciliariu en cumpliendo una sesta parte de los cinco años de pena a los que lu sentenciaren.
El Tribunal Supremu revisó'l casu y consideró que, na primer condena, la corte nun tuvo en cuenta que Pistorius tenía que conocer el posible resultáu de les sos acciones. Por esti motivu, dio la razón a la Fiscalía y consideró que'l delitu que correspuende nesti casu nun ye'l d'homicidiu sinón el d'asesinatu.
SABÍA QUE PODÍA MORRER
"Nun tengo nenguna duda de que, al realizar los disparos, l'acusáu previó que la persona que tuviera detrás de la puerta podía morrer", aseguró'l xuez Eric Leach, según medios llocales. Leach consideró un "error fundamental" la considerancia d'estos fechos como homicidiu.
El xuez debe agora determinar una nueva pena pa Pistorius, magar una condena d'esti tipu plantega un mínimu de 15 años de cárcel. L'atleta nun asistió a la vista d'esti xueves.
Foto: POOL NEW / REUTERS
