Andecha Astur comparte cola Academia de la Llingua Asturiana la denuncia de la discriminación que carez la nuesa llingual, espresada de nueu na falta de presupuestos afayaizos pa la so defensa y espardimientu, pero recuerda que nun hai que tracamundiase: lo primero y básico ye la OFICIALIDÁ.

Pa poder contar con una partida presupuestaria afayaíza nos presupuestos asturianos y aceder tamién a les sovenciones millonaries de los presupuestos del Estáu y de la UE pa les llingues oficiales, nun hai que perder de vista lo fundamental: que la llingua asturiana seya OFICIAL. Mientres siga dándose l´actual situación de falta de reconocencia llegal, la discriminación presupuestaria ye inevitable. Lo único esperable son les migayes que los partíos de la Xunta Xeneral tengan a bien conceder.

 Énte la protesta que l’Academia de La Llingua Asturiana vien de faer pública pola miseria presupuestaria en materia llingüística nos presupuestos que se tan tramitando  pa esti añu pol “Principado” , Andecha Astur quier sopelexar el sofitu dafechu a esta Istitución, amestándose a la denuncia de la situación de represión y discriminación que carez el Pueblu Asturianu, pero faciendo un pernecesariu esclariamientu: lo primero ye la OFICIALIDÁ.

Nun ye nuevo que los partíos políticos de la Xunta Xeneral escaezan los sos compromisos pa cola llingua recoyíos nos sos programes ellectorales. Ye más, ye precisamente esa traición la desplicación de la situación de que carez la llingua asturiana. IU, Foro y Podemos, xunto cola eterna cerrazón del PSOE y del PP, son cómplices d´ella.

Andecha Astur considera que ye perimportante nun tracamundiar les prioridaes y afitar que por munchu presupuestu que destine’l “Principado” al asturiano, seya pa la so rede clientelo-familiar de la Oficina de Política Llingüística, seya pa la mesma ALA, la represión siguirá siendo un fechu y que mentes nun se garantice’l drechu de los asturianos y asturianes a utilizar la so propia llingua dientru’l so país con toles consecuencies taremos falando de concesiones arbitraries, non de drechos.

Ello asina, la falta de respetu a los drechos democráticos más ellementales,  internacionalmente reconocíos, por parte de los partíos con representación na Xunta Xeneral, y ainda más, la hipocresía d’aquellos que dicen ser favoratibles a la Oficialidá (Foro, IU, Podemos), nun ta en función de la esistencia de mayores o menores presupuestos pa la llingua, sinon de la reconocencia efeutiva de los drechos llingüísticos del Pueblu Asturianu.

Una vuelta más, Andecha Astur desixe la OFICIALIDÁ del asturiano comu pasu obligáu pa la normalización democrática en materia llingüística y primer pasu pa la so recuperanza, y denuncia les actitúes de posturéu de quienes dicen tar a favor d’esi drechu, pero nun lu reconocen allí onde tienen poder políticu.