Dos propietarios de bonos de la compañía Abengoa presentaron na Audiencia Nacional la primer querella contra l'antigua cúpula de la compañía, en concursu d'acreedores dende'l pasáu 26 de payares, por buscar el so "propiu beneficiu y arriquecimientu personal" al concedese indemnizaciones millonaries en cuenta de "salvar a los sos miles d'inversores".
La querella, presentada pol abogáu Felipe Izquierdo, diríxese contra l'expresidente del Conseyu d'Alministración d'Abengoa Felipe Benjumea y l'exconseyeru delegáu Manuel Sánchez Ortega, a los que s'atribúin en calidá de nicios un delitu d'alministración deslleal y otru d'usu d'información privilexada.
Los bonistes señalen que Benjumea y Sánchez Ortega yeren "conocedores de l'auténtica realidá económico-financiera" de la empresa y que buscaron el so arriquecimientu "en cuenta d'utilizar dicha información pa salvar a miles d'inversores que van vese atrapaos na situación concursal de la entidá y, de camín, a tolos contribuyentes españoles que tendrán qu'acudir al so rescate".
Asina, poco primero que la compañía solicitara nun xulgáu mercantil de Sevilla'l preconcursu oficial d'acreedores, Benjumea axudicóse una "exorbitante" indemnización por importe de 11.480.000 euros.
Sánchez Ortega, que dexó la empresa en mayu pasáu, percibió, pela so parte, una "contraprestación post-contractual" de 4.480.000 euros, a lo qu'habría que sumar 3.300.000 euros en conceptu de "bonus variable" que va percibir "a cuenta del 2015 hasta la so salida". Al cabu d'unos díes, según la querella, fichó pol fondu d'inversión Blackrock y, un mes dempués, la xestora tomó "fuertes posiciones baxistes" en relación colos valores d'Abengoa.
REPERCUSIÓN NA ECONOMÍA NACIONAL
Los querellantes xustifiquen la competencia de l'Audiencia Nacional pa investigar estos fechos en qu'esti tribunal ye'l competente en materia de "defraudaciones y maquinaciones p'alterar el preciu de les coses que produzan o puean producir grave repercusión na seguridá del tráficu mercantil, na economía nacional o perxuiciu patrimonial nuna xeneralidá de persones nel territoriu de más d'una audiencia".
Nesti contestu, recuerden qu'Abengoa tien más de 50.000 accionistes dientro y fuera d'España, cuenta con presencia en más de 80 países y emplega a 25.000 persones, de les que 6.700 trabayen en territoriu nacional.
Amás, señalen que l'Estáu podría llegar a perder cerca de 800 millones d'euros, dao que'l ministru d'Economía, Luis de Guindos, señaló'l vienres pasáu que'l "riesgu directu" de l'Alministración na empresa ye de 415 millones, de los que 210 correspuenden a l'aseguradora de creitu Cesce, 130 al Institutu de Creitu Oficial (ICO) y 75 a Cofides. A esta cifra habría que sumar, según la querella, los 582 correspondientes a Bankia, "onde l'Estáu sigue teniendo'l 64% del capital".
Según los datos recoyíos nesti escritu, la empresa podría tener una deuda d'unos 25.000 millones d'euros, "daqué más de la metá del rescate financieru al Estáu español". Les sos acciones de clase A y B llegaron a cotizar a 3,570 y 3,299 euros, respectivamente, y cayeron el pasáu día 27 a 0,440 y 0,292 euros.
