En concreto, el consumu aceleróse sensiblemente no que cinca al segundu trimestre, mientres que la inversión perdió daqué de puxu y mostró un crecimientu trimestral del 1,1%, frente al 2,4% del trimestre anterior.

   La tasa interañal del PIB, pela so parte, quedó nel 3,4% nel tercer trimestre, dos décimes más que nel trimestre anterior, entainando la trayectoria de recuperación qu'entamó na segunda metá del 2013. D'esta manera, el crecimientu interañal de la economía española vuelve a niveles d'últimos del 2007.

   L'INE esplicó que l'aceleración na variación interañal del PIB ye consecuencia d'una mayor aportación de la demanda nacional (3,9 puntos frente a 3,3 puntos nel trimestre anterior) y d'una mayor contribución negativa de la demanda esterna (-0,5 puntos frente a -0,1 puntos nel trimestre previu).

   Col repique trimestral del PIB ente xunetu y setiembre encadénense yá nueve trimestres d'avances, mientres que la tasa interañal atropa siete trimestres en positivu.

EL GASTU EN CONSUMU DE LOS LLARES, EL QUE MÁS CREZ

   El consumu de los llares mostró nel tercer trimestre del añu un crecimientu trimestral del 1%, una décima más que nel trimestre anterior (0,9%), colo que yá suma diez trimestres consecutivos en positivu.

   El gastu de les instituciones sin fines d'arriquecimientu al serviciu de les families tamién s'aceleró, nesti casu una décima, hasta'l 0,2%, igual que'l gastu de les alministraciones públiques, qu'aumentó un 0,9% nel tercer trimestre, dos décimes más que nel trimestre anterior.

   La formación bruta de capital fixu, pel so llau, elevóse un 1,1% no que se refier al trimestre anterior, desacelerando'l so crecimientu en 1,3 puntos pol menor repique de la inversión en construcción (0,6% nel tercer trimestre frente al 2,2% del segundu) y en bienes d'equipu (2,3% frente a 3,6%).

   Nel tercer trimestre del añu, les esportaciones aumentaron un 2,8%, frente al 1,4% del trimestre anterior, mientres que les importaciones avanzaron un 4%, lo que supón 2,4 puntos más que nel trimestre anterior (1,6%).

EL GASTU PÚBLICU, EL QUE MÁS ACELERA LA SO MEYORA INTERAÑAL

   En tasa interañal, la economía española creció nel tercer trimestre un 3,4%, gracies a la mayor demanda interna, dao que la demanda esterna elevó la so contribución negativa al PIB. Los dos principales componentes de la demanda nacional (consumu ya inversión) mostraron crecimientos superiores a los del segundu trimestre.

   En términos interañales, el consumu de les families, de les instituciones sin fines d'arriquecimientu y de les alministraciones públiques rexistraron meyores interañales del 3,5%, del 0,9% y del 3%, respectivamente.

   El consumu de les families aceleró seis décimes el so crecimientu interañal, mientres que el de les instituciones sin fines d'arriquecimientu foi siete décimes superior. Pero fueron les alministraciones públiques les que más aumentaron la so meyora interañal no que cinca al trimestre anterior, nueve décimes, dende'l 2,1% al 3%.

   Pel so llau, la inversión rexistró un crecimientu interañal del 6,5%, dos décimes más que nel trimestre anterior, con un repique de la inversión en construcción del 5,5%, el mesmu que nel segundu trimestre, mientres que la inversión en bienes d'equipu aceleró siete décimes, hasta'l 10,6%.

LES ESPORTACIONES RALENTICEN EL SO CRECIMIENTU INTERAÑAL

   Nel tercer trimestre, la contribución negativa de la demanda esterior neta aumentó no que cinca al trimestre anterior, hasta asitiase en -0,5 puntos. Les esportaciones desaceleraron seis décimes el so crecimientu interañal, dende'l 6,2% al 5,6%, mientres que les importaciones amontaron siete décimes el so avance interañal, hasta'l 7,7%.

   Dende la óptica de la ufierta, casi toles cañes d'actividá presentaron nel tercer trimestre un meyor comportamientu interañal que nel segundu trimestre.