"La esperiencia demuestra que la violencia, los conflictos y el terrorismu que s'alimenta del mieu, la rocea y la desesperación nacen de la probeza y la frustración", aseguró Francisco nun discursu dirixíu a les autoridaes y el cuerpu diplomáticu de Kenia nel palaciu presidencial, State House, onde antes se reunió col presidente, Uhuru Kenyatta.

   "N'última instancia, la llucha contra estos enemigos de la paz y la prosperidá tienen que llevala a cabu homes y muyeres que creen nella sin medrana, y dan testimoniu creíble de los grandes valores espirituales y políticos qu'inspiraron la nacencia de la nación", añadió.

   El Pontífiz señaló, amás, que pa esaniciar les divisiones sociales, "yá seyan étniques, relixoses o económiques," ye necesario que tolos homes y muyeres de bona voluntá trabayen "pola reconciliación y la paz, el perdón y la sanación". "El llabor de construyir un orde democráticu sólidu, de fortalecer la cohesión y la integración, la tolerancia y el respetu polos demás, ta dirixíu primordialmente a la busca del bien común", esplicó.

   El Papa pidió a los políticos que s'esmolezan poles necesidaes de los probes, asina como poles aspiraciones de los mozos. Pal Pontífiz, la mocedá ye "la riqueza más valiosa d'una nación". "Protexelos, invertir nellos y tende-yos una mano ye la meyor manera que tenemos pa garantiza-yos un futuru dignu de la sabiduría y de los valores espirituales apreciaos polos sos mayores, valores que son el corazón y l'alma d'un pueblu", señaló.

   Nel so discursu, aseguró que "Kenia ye una nación nueva y brillosa, una sociedá de gran diversidá, que desempeña un papel significativu na rexón" de la que detalló que los sos ciudadanos "tienen gran apreciu" polos recursos naturales d'esa rexón.

Foto: STEFANO RELLANDINI / REUTERS