Funcionarios de Chicagu publicaron el videu de la muerte a tiros de Laquan McDonald, de 17 años d'edá, pocu dempués de que los medios de comunicación llocales se ficieren con una versión amenorgada del mesmu. El documentu lliberóse malpenes unes hores dempués de qu'al axente lu acusaren d'asesinatu en primer grau.

   El videu fízose públicu mientres una conferencia de prensa na tarde d'esti martes, en cumplimientu d'una orde del xuez, según informó'l diariu estaounidense 'The New York Times'.

   Hai preocupación por posibles biltos de violencia, disturbios y manifestaciones asemeyaes a les qu'asocedieron en Baltimore, Ferguson y Missouri dempués de los crimes de mozos afroamericanos nes zones. La Policía de Chicagu dixo que "va facilitar" les protestes, pero alvierte que nun va tolerar el comportamientu criminal.

   Ye la primer vez na historia de Chicagu qu'un policía ta acusáu d'asesinatu. Según les palabres del alcalde, Rahm Emanuel, esta muerte a tiros ye un "fechu horrible" y "sin xustificación". "Ta bien ser apasionáu, pero ye esencial permanecer tranquilos nestos momentos", añadió.

   Pela so parte, el superintendente de la Policía, Garry McCarthy, llama al civismu frente a posibles manifestaciones y añade que l'acusáu "va pagar poles sos acciones", tal como publica'l citáu periódicu.