Va unos meses Hamill viaxó hasta Irlanda onde empezó'l rodaxe del Episodiu VIII. Agora ye'l mesmu actor el qu'al traviés de la so cuenta de Twitter confirma la so participación na cinta. "Últimu afeitáu'l 22 d'ochobre dempués del últimu día del mio segundu episodiu de The Flax que s'estrena'l 8 d'avientu, xusto pal Episodiu VIII", escribió.

   Con estes palabres Hamill desveló que Luke Skywalker va tar na octava entrega de Star Wars y va llucir barba. Un detalle que ye más de lo que sabemos del Jedi en 'El despertar de la Fuerza', na que'l so papel ye un auténticu misteriu.

   El yá veteranu Skywalker ye'l gran ausente de la campaña promocional, dao que pel momentu, nun apaeció en nengún adelantu nin en nengún cartel. Una ausencia que J.J. Abrams aseguró que nun ye casual.

ESTRENU NEL 2017

   Esta nueva entrega, dirixida por Rian Johnson, va llegar a les sales de cine en mayu del 2017. Antes de disfrutar del Episodiu VIII de la saga, vamos poder ver el próximu 18 d'avientu na gran pantalla 'Star Wars: el despertar de la Fuerza'.

   Esti filme ta dirixíu por J.J. Abrams y nél volveremos ver a los protagonistes de la triloxía orixinal: Harrison Ford (Han solo), Mark Hamill (Luke Skywalker) y Carrie Fisher (Leia). Tamién van tornar Peter Mayhew (Chewbacca), Kenny Baker (RD-D2) y Anthony Daniels (C-3PO). Tocantes a les nueves incorporaciones, na nueva entrega vamos ver ente otros a Lupita Nyongo, Andy Serkis, Max von Sydow, Oscar Isaac, Adam Driver, Daisy Ridley, Gwendoline Christie, Domhnall Gleeson y John Boyega.

   Un añu dempués va estrenase Star Wars: Rogue One, el primeru de los spin-off dirixíu por Gareth Edwards (Godzilla, Monsters), que va llegar a les sales de cine n'avientu del 2016. Dempués del estrenu del Episodiu VIII, va dir otru spin-off, que va tar protagonizáu por Boba Fett. Dempués va llegar a les sales de cine la novena y última entrega dirixida por Colin Trevorrow (Jurassic World) de la nueva triloxía, que va ver la lluz nel 2019.